رسالة من أمهات مصر قبل إعلان نتيجة الثانوية العامة

وجهت عبير أحمد، مؤسس إتحاد أمهات مصر للنهوض بالتعليم، وإئتلاف أولياء الأمور، رسالة ومنشور لأولياء الأمور، قائله: "قبل نتيجة الثانوية العامة.. ايه الرسالة اللي تحبي توجيها لأبنك أو بنتك قبل النتيجة".

وإنهالت التعليقات من جانب أولياء أمور طلاب الثانوية العامة، علي صفحة اتحاد أمهات مصر للنهوض بالتعليم، في الفيسبوك، حيث قالت ولي أمر موجه حديثها لابنها: "ربنا وضعلك طريق والاب والام قاموا بتمهيد الطريق وانت عليك أن تمشى فى الطريق باستقامه علشان توصل بالسلامة".

وأضافت ولي أمر أخري: "عملت اللى عليك وزيادة واى مجموع انا فخورة انك ابنى، واتمنى كل ام يكون معها ابنك زيك يا عمرى، ربنا يجبر بخاطرك ويراضيك ويكرمك على كد كرمه ويسعدك دنيا وآخره ودايما تكون بار بيه، بحبك كد الدنيا وما عليها".

واستكملت ولي أمر أخري: "هقول لابني انا فخوره بيك مهما كانت النتيجه انت تعبت وبذلت مجهود كبير، ان شاء الله ربنا يجبر بخاطرك ويفرحني بيك يا حبيبي قلبي"، وذكرت أخري: "ربنا يكرمك يا ابني، عملت اللي عليك واكتر مهما كان مجموعك انت بطل والله  وبإذن الله ربنا هيجبر بخاطرك ولا يضيع تعبك".

وقالت ولي أمر: "انا فخورة بيك في كل الاحوال وعارفه انك عملت الا عليك وزيادة كمان، ولذلك عندى يقين بجبر خاطرنا من ربنا وبمجموع كبير كمان، وفي كل الاحوال هنسجد لربنا ونشكره وبرضو هنطلع حاجة لله".

وأضافت أخري: "ربنا يراضيكي ويجبر بخاطرك يا بنتي انتي واللي زيك ويدخل الفرح بيتي يارب، اقولها انا راضيه بقضاء ربنا ايا كان هي اي ربنا كاتب لينا اي حاجه خير، طبعا انتي عملتي اللي عليكي انا فخوره بيكي ايا كانت النتيجة، كفايه مراحل الامتحانات اللي مريتي بيها تعب ومرض وعديتي بفضل الله كلو خير يارب".