بعد إنجاب مولوده التاسع.. تامر أمين لـ رضا البحراوي: براحة على مصر

علّق الإعلامي تامر أمين، على إعلان المطرب الشعبى رضا البحراوي، أنه رزق بمولوده التاسع، والذي أطلق عليه اسم «ريان»، مقدمًا له التهنئة.

وقال تامر أمين، خلال تقديمه لبرنامج «آخر النهار»، المذاع عبر فضائية «النهار»، مساء الأربعاء: «أولًا ألف مبروك يا رضا ويارب تفرح بذريتك، وقبل ما تكلم ربنا يزيد ويبارك وربنا يديك الصحة، بسم الله ما شاء الله، بس كلامي لرضا وكل رضا أنا بسأل سؤال مش كتير علينا إحنا».

وأضاف تامر أمين: «هتقولي وإنت مالك، هو إنت اللي هتصرف عليه وهتربيه، هقولك ربنا يقدرك وتطلعه أحسن الناس، بس هو كتير علينا وعلى مصر، وكلامي مش بس لرضا، كلامي لكل الناس التانية اللي فاتحة باب الخلفة على البحري، كتير علينا».

التعبئة والإحصاء: مولود جديد كل 14 ثانية في مصر

وأشار إلى إعلان الجهاز المركزي للتعبئة العامة والإحصاء عن وجود مولود جديد في مصر كل 14 ثانية، يعني 4 مواليد في الدقيقة الواحدة، متابعًا: «4 مواليد كل دقيقة عايزين 4 أماكن في المدارس، و4 أماكن لا قدر الله لو مرضوا في المستشفيات، وعايزين 4 أماكن في المواصلات، ودعم وبطاقات التموين وشقق وفرص عمل».

وعن تفسير رضا البحراوي إنجابه الكثير من الأبناء بسبب حبه للعزوة، قال «أمين»: «خد عزوتك من أصحابك وأهلك وأولادك، لكن كفاية اثنين أو ثلاثة أو أربعة، لكن تسعة، ورضا لسه شباب، يعني لو كمل على المسيرة دي مش هنلاحق عليه، بسم الله ما شاء الله، ربنا يديك الصحة، القصة هنا مش رضا، أنا بقول لكل الناس في مصر براحة على مصر، إنتوا شايفين الأوضاع والأزمات والأسعار والموارد، واحدة واحدة».