الورقي
شريف منير يدعم ابنته بعد حلاقة شعرها عالزيرو: هي حرة وأنا مبسوط منها
أعرب الفنان شريف منير عن فخره بابنته «أسما»، بعد حلاقتها شعرها تمامًا، وظهورها باللوك الجديد في حفل مهرجان القاهرة للدراما، يوم الخميس الماضي، بالعلمين الجديدة.
وقال، خلال مقطع فيديو، عبر حسابه على موقع الصور الشهير «انستجرام»: «إيه الضجة والدوشة اللي أنتم عاملينها دي، كل ده علشان بنتي قصت شعرها قدام الكاميرا، إيه الغلط اللي عملته، تصرف عادي جدًا مفهوش أي حاجة».
وتابع: «إوعوا تفتكروا إن أنا ممكن أجي على بنتي علشان خاطر أكسب رضاكم، دي بنتي اللي مليش غيرها واللي بحبها، وبالمناسبة اللوك عاجبني وأنا مبسوط منها أوي».
وأضاف «شريف»: «قبل الإخوة السادة الملايكة الصالحين، اللي عمالين يقلوا أدبهم ويشتموا، ويقولوا بتاخد تريند وأبوها معرفش يربيها، أنا بنتي متربية كويس جدًا، وبتتصرف باللي هي حاسة بيه، المهم إنها مش بتأذي حد، وقبل ما تتكلموا بصوا على نفسكوا وعلى ولادكم وإخواتكم قبل ما تنتقدوا وتغلطوا».
وأوضح: «أسما عندها 36 سنة، وأم ومسؤولة عن نفسها، ريحوا نفسكم واهدوا شوية، اللي حصل من بنتي مش غلط، وهي حرة في تصرفاتها».
وأنهى شريف منير، حديثه، موجهًا رسالة لابنته: «أسما أنت شكلك زي القمر وكان حلو جدًا، وبرافو عليكي إنك أخدت التريند، متسمعيش كلام حد ومتهتميش بكلام حد، وأنا مش مهتم بالكلام اللي بيتقال عني أو عليها».
كانت أسما شريف منير، ظهرت، في مقطع فيديو، وهي تحلق شعرها، وقالت إنه أصبح غير صحي، بالإضافة إلى تأثير مرض الغدة عليه، وهو ما كان مفاجئًا لمتابعيها.
