الورقي
أمهات مصر: الجامعة لها قدسيتها والاحتفال بالتخرج يجب أن يكون في حدود
أثار انتشار وصلات الرقص فى حفلات التخرج الجامعى العديد من الأقاويل مابين معارض ورافض للفكرة، ومؤيد لها، نتناول فى هذا التقرير اراء الجانبين.
أعدت أمهات مصر للنهوض بالعملية التعليمية، تقرير رصدت فيه اراء الأمهات، حول ظاهرة انتشار وصلات الرقص، فى حفلات التخرج الجامعى، بدأ الرصد بسؤال تم طرحه “ايه رأيكم في حفلات التخرج وهل ليكم أي ملاحظات عليها”، سؤال طرحه اتحاد أمهات مصر للنهوض بالتعليم، وائتلاف أولياء الأمور، بعد حالة الجدل المؤيدة والمعارضة لحفلات التخرج الأيام الماضية.
وقالت عبير أحمد، مؤسس اتحاد أمهات مصر، إن الحرم الجامعي له قدسيته وهيبته واحترامه، ومن حق الطلاب والطالبات أن يحتفلوا بتخرجهم ولكن بطريقة تليق بالمكان الذين تعلموا فيه، دون ارتداء ملابس غير لائقة والرقص.
وانهالت التعليقات من جانب الأمهات من أولياء الأمور، في صفحة الاتحاد والائتلاف في الفيسبوك، حيث قالت ولية أمر: "كنت لسة بتكلم امبارح مع زوجي وأولادي فالقصة دي، بجد انا مش متخيله ازاي الطالبة أو الطالب يطلع يرقص علي المسرح أمام الدكاتره بتوعه بالمنظر ده ونقول دي فرحه، ما طول عمرنا بنفرح من غير رقص، وزاد وغطي كمان رقص الأمهات مع أولادهم في ايه يا جماعه".
وأضافت ولية أمر أخرى: "بقت غريبة جدا تكاليف وبهرجه ورقص ولا كأنه فرح العمده، كل حاجه في حدود المعقول والأصول حلوة وليها طعم"، وتابعت ولي أمر أخري: "اللي بنشوفه مش حفله تخرج دى حنه فى شارع".
"ازاي رقص وأغاني جوه الحرم الجامعي، فين وقار دكتور الجامعة الطلبة واقفة ترقص أمامة دا مش تخرج من جامعة خالص بصراحة"، تضيف ولية أمر أخري، مستكملة: "مش وحشة بس لازم يكون فيه حدود للفرحه".
وقالت ولية أمر: "بتبقى جميلة وذكرى حلوة خصوصا إن محدش هيلاقي التاني بعد الجامعة والحياة هتاخد الجميع، بس من الملاحظ إن الموضوع بقى فرح مش حفلة تخرج"، وعلقت ولي أمر أخري: "بحس إنها بتكون مبهجه وثمرة تعب سنين لكن يجب أن تكون بالشكل الأكاديمي وليست علي طريقة حنه شيماء".
وقالت ولية أمر: "العيال مابيصدقوا يخلصوا، إذا كان سنة رابعة ابتدائي لما خلصوا امتحان رقصوا وغنوا أدام المدرسة"، واقترحت ولي أمر أخري: "لو كل دفعة جمعت فلوس حفلة التخرج وعملوا بيها حاجه لوجه الله تعالى تكون أفضل، نعرف أولادنا إن كل بداية جديده لازم تكون بداية فيها خير وبركه لكن غناء ورقص بداية خاطئه".
وتابعت ولية أمر أخرى: "لسة حالا كنت بتكلم مع بناتي وزوجي عن الوضع اللي وصلت له حفلات تخرج الطالبات والفساتين السواريه والرقص الغير مبرر وظهوره علي النت بين مؤيد ومعارض.. أنا عن نفسي معارضه جدا للوضع ده ومحدش يقول دي حريه شخصيه أو كل حد يفرح بأسلوبه".
بينما قالت ولية أمر: "حاجه حلوه الولاد بتحس إن رحلة التعليم خلصت وهينزلوا لمجال الشغل والحياة العملية... ربنا يفرح قلوبهم ويفرحنا بولادنا جميعا"، وأضافت ولي أمر أخري: "الفرحة حلوة مافيش كلام، بس لازم يكون في احترام للدكاترة اللي علموهم وموجودين معاهم في الحفلة والزي اللي هما لابسينه ده زي الحاصلين علي العلم مش للرقص، استلم شهادتك بكل احترام واتصور مع دكتورك اللي علمك وله فضل عليك وبعدين اخلع الزي اللي له مكانته وروح ارقص في أماكن مخصص للرقص مش للعلم والاحترام".
