تامر حسني عن أحداث غزة: "اوعوا تشكوا في رحمة ربنا مهما شوفتوا مشاهد صعبة"

علق الفنان تامر حسني، عبر حسابه الرسمي على موقع التواصل الاجتماعي "فيسبوك" على الأحداث التي تشهدها غزة في الفترة الحالية.

وقال تامر حسني: "من قوة تمسكي واصراري وقناعتي برحمة ربنا، بقالي فتره بدرس فكره معينه اعتقد بتشغل ناس كتير الوقت ده بسبب الحالة النفسية المرعبة اللي عايشينها كلنا.. كنت بقول معقول اللي بيتقتلوا ظلماً بالبشاعة دي في كل زمان هل بيحسوا وبيشوفوا هول ورعب الموقف ويتعذبوا بالطريقة الغير محتمله الواضحة للأشخاص الآخرين اللي حاضرين الموقف او شافوا الموقف في تلفزيون او موبايل".

وأضاف: "درست الموقف ده على حد اجتهادي الشخصي وصلت لآية في القرآن الكريم مهمة جداً (فكشفنا عنك غطاءك فبصرك اليوم حديد) يعني اللحظة اللي اراد فيها ربنا أن يقبض روح بني آدم يدخل البني آدم في عالم آخر ويشوف حاجات تانية الناس اللي عايشين ميقدروش يشوفوها، يعني اللي بيتفرج بيشوف مشهد صعب جداً قد ليتعظ او لأي سبب اخر بس اللي في الموقف والموت ينتظره مش بيشوف العذاب ده عشان بصره اليوم بيبقى حديد يعني بيدخل في عالم وزمن تاني عند ربنا  فابيشوف حاجات تانية".

وتابع تامر حسني: "ومهما تشوفوا جثث محروقه او مقتولة، تأكدوا أن ربنا كان رحيم بأصحابها ومشافوش الموقف الصعب اللي انتوا شوفتوه ده، و سورة الواقعة تثبت ده في الآية الكريمة دي (فلولا اذا بلغت الحلقوم و انتم حينئذ تنظرون ونحن اقرب اليه منكم و لكن لا تبصرون) صدق الله العظيم، يعني لو الروح او خروج النفس بيحصل و انتوا شايفين يعنيكم مثلاً شخص مظلوم وتم الغدر به و النار ماسكه فيه ويصرخ و انتوا شايفينه قدام عينكم بيتعذب ربنا هنا بيقول ان في اللحظة دي ربنا بيكون اقرب اليه منكم بس انتوا مش هتشوفوا يعني بتكون روحه بين يد ربنا بكل حب ورحمه و المشهد الصعب اللي انتوا شايفينه ده الشخص مش حاسس بيه خالص".

واستكمل: "اوعوا تشكوا في رحمة ربنا مهما شوفتوا قدام عينكم مشاهد صعبة، وعلى النقيض لما بيموت الظالم بيشوف مالا يسره وما يفزعه في طريقة اخذ روحه وبعد دراستي الشخصية الفكرة دي اتأكدت من بعض رجال الدين الكبار التي تجمعني بهم صداقه و محبه واكدولي صحة ما بحثت عنه .. جزاهم الله كل الخير.. سبحان الله .. القرآن مسابش لحظه متكلمش فيها وشرحها بدقه".

وأوضح حسني: "والله يا جماعة انا واثق ان كل حد فينا عنده مصاحف كتير بس للأسف في منها مهجور الكتاب ده عظيم ومعجزه عايشه معانا وللأسف في بعضنا مش حاسس بقيمتها.. بوست من اجتهادي الشخصي ياريت اكون وصلت شيء من الطمأنينة والاكثر مني علم ياريت يفيدنا بأكثر وياريت كلنا نجتهد لنشر كل ما يطمن عن رحمة ربنا لعباده".