الورقي
«اللي مش هيحترمنا مش هنحترمه».. القصة الكاملة لـ«خناقة» محمود العسيلي وحسن شاكوش بسبب «المهرجانات»
شهدت الساعات الأخيرة على مواقع التواصل الاجتماعي، حالة من الشد والجذب، بين الفنان محمود العسيلي ومطرب المهرجانات حسن شاكوش، وصلت إلى الإهانة المتبادلة.
بدأت القصة بحديث محمود العسيلي عن النجم الأكثر استماعًا على جميع المنصات، خلال لقائه ببرنامج «حبر سري» للإعلامية أسما إبراهيم، على قناة «القاهرة والناس»، وهو عصام صاصا.
وقال: «في واحد معرفوش خالص وعمري في حياتي ما سمعته هو الأكثر استماعًا على جميع المنصات معرفش هو بيغني إيه فعلًا بس هو الأكثر استماعًا على كل المنصات أكتر من كل الناس في الوطن العربي».
وتابع: «الراب هيجيله وقت ويختفي لأنه مبني على موضة غير ناس قليلة جدًا اللي عندهم حاجة ثابتة وبيبنوا، أنا بالنسبة لي مطربي المهرجانات موجودين هما كان نجاحهم كبير بس مبقوش زى الأول ودا اللي بتكلم فيه بتبقى ظواهر، في حاجات بتطلع ظاهرة زي شعبان عبد الرحيم».
ورد حسن شاكوش على تصريحات «العسيلي»، ببث مباشر، عبر حسابه على موقع الصور الشهير «انستجرام»، قائلًا: «ماينفعش نبقى في وش بعض نتكلم بأسلوب وفي الضهر نتكلم بشكل تاني وأنا مابحبش البني آدم اللي كده.. محمود العسيلي حضر لي أكتر من حفلة وكنت بنزل من على المسرح وبسلم عليه.. ده ذوقيًا.. ولأن ده اللي اتربيت عليه».
ووجه رسالة لـ«العسيلي»: «يعني أنت عرفت عصام صاصا ومش عارف أغانيه، ماينفعش يكون هو تريند وأطلع أقول معرفش هو بيغني إيه.. إحنا الحمد لله مسمعين وموجودين اللي هيحترمنا هنشيله فوق دماغنا واللي مش هيحترمنا مش هنحترمه».
وأكمل: «لما الشعبي والراب هينام مين هيبقى موجود، أومال مين هيرقص الناس».
كما أضاف في بث آخر: «كل نجم ليه وقت ولازم ياخد هدنة بس لما بيرجع بيطلع حاجات هتقعدكم في بيتكم، وإحنا مجال المزيكا بتاعتنا والمهرجان والغنوة الشعبي ده مش هيموت، الناس تعبت من كتر الاكتئاب، والأغاني اللي بتجيب الاكتئاب وبتجيب ملل وبتعقدهم».
وذكر «شاكوش»: «الناس ما بتصدق تسمع أغنية شعبي ليا أو لأي مطرب شعبي زي حمو بيكا وعمر كمال، وبيحبوا يسمعوا الأغاني بتاعتنا عشان بنطلع الواحد من المود، أنا مثلًا كحسن شاكوش لما بسمع أغنية لـ شيرين عبد الوهاب ببقي عايش مود الأغنية».
واستكمل: «أغاني المهرجانات مكملة، وإحنا لسه بنبتدي في حياتنا ولسه صغيرين، ومفيش واحد فينا عدى الـ 35 سنة وإن شاء الله مكملين في النجاح، والنجاح اللي إحنا فيه وقدمناه يشغلنا ويعيشنا 20 سنة قدام، بس إحنا مش آخرنا كده، إحنا عايزين نطور ونجدد».
