«أمهات مصر» ترصد كيفية تعامل أولياء الأمور مع أخطاء أبنائهم فى الامتحانات

رصد اتحاد أمهات مصر للنهوض بالتعليم،  من خلال طرحه سؤال: "لو ابنك أخطأ في الامتحان بتتعاملي معاه إزاي؟".. كيفية تعامل أولياء الأمور مع أخطاء أبنائهم في الامتحانات.

في الامتحانات يقع معظم الطلاب في بعض الأخطاء عند الإجابة على الأسئلة، ورغم أن أغلبهم يعلمون الإجابة الصحيحة ولكن قد يكون الوقوع في هذا الخطأ نتيجة التسرع أو النسيان أو التوتر.

عبير أحمد، مؤسس اتحاد أمهات مصر للنهوض بالتعليم، وإئتلاف أولياء الأمور، طرحت هذا الموضوع للنقاش، بين الأمهات من أولياء الأمور، قائلة: "بتتعاملوا مع أولادكم ازاي لو عرفتوا انهم أخطأوا في الامتحانات وازاي بتطمنوهم عشان يركزوا في المادة اللي جاية؟".

وأشادت مؤسس اتحاد أمهات مصر وإئتلاف أولياء الأمور بتعليقات وطريقة تعامل أغلب أولياء الأمور مع أبنائهم الذين يقعون في بعض الأخطاء عند الإجابة على الأسئلة، وكذلك بمستوى رد فعلهم الراقي والمفيد لنفسية وتشجيع الأبناء.

وتفاعل العديد من أولياء الأمور على صفحة اتحاد أمهات مصر للنهوض بالتعليم وائتلاف أولياء الأمور، في الفيسبوك، حيث قالت ولي أمر: "المهم يعرف الخطأ ايه عشان ميكرروش لو ناتج عن عدم فهم للمعلومة، ولو خطأ ناتج عن تسرع يبقى ننصحه يهدأ وبلاش يتوتر دون داعي، وأهم حاجة إن مفيش مشكلة لو غلطنا أو نقصنا نتيجة جهل بمعلومة أو صعوبة سؤال ما دام مفيش تقصير من جهتنا".

وأضاف ولي أمر أخرى: "بقولها ولا يهمك، المهم نعرف احنا غلطنا ليه وفى إيه علشان منكررش الغلط ده تانى، ومهما كانت هيا غلطت فى إيه  عمرى ما ازعق علشان خاطر امتحان، المهم نفسيه البنت تبقى مطمنة وإنه ا تقدر تكمل بقيه الامتحانات".

واستكملت ولي أمر ثالثة: "بقولها أهم حاجه عرفت الصح ايه؟ يبقى خلاص هتستفيدى من الغلط المره الجايه وعمرك ما هتغلطى فيها تانى، وكمان بقولهم انا عمرى ما احاسبكم على درجة ولا ازعل على درجة لكن ازعل على تقصير فى مذاكره وانكم مش قد المسؤولية لو أنا متأكده انكم عملتوا اللى عليكم خلاص بالنسبة لى كده جبتوا الدرجات النهائية والعكس لو جبتوا درجات كويسة وانا عارفه انكم مقصرين ومذاكرتوش كويس هزعل ومش هفرح بالدرجات".

وذكرت رابعة: "بقول لإبنى اللى انت حليته خلاص، نركز فى المادة اللى جايه ومنكررش الخطأ تانى، بقوله انت تعبت وذاكرت وعملت اللى عليك عشان نفسيته ويعرف يفكر فى الماده اللى بعدها".

وتابعت خامسة: "انا مش براجع أى مادة فى فترة الامتحانات اصلا لأن المراجعة بتسيب اثر محبط مهما كان الكلام غير المراجعة مش هتغير اى شيء من النتيجة، احنا بنجتهد طول الترم وبعدين نمتحن ويوم الامتحان بقولهم انى متقبلة النتيجة ايا كانت لأننا تعبنا، وبس
والحمدلله ربنا بيكرمنا على قد تعبنا،
اولادى اهم من اى شيء".