«بينام على الكنبة».. سارة تصرخ وتطلب الخلع بعد شهر زواج واحد

«متجوزاه عشان ينام قدام التلفزيون، بياكل أكتر ما بيتنفس، وحياته مقضيها ع الكنبة»، كلمات وقفت ترويها «سارة. ح»، أمام محكمة الأسرة بمصر الجديدة تطالب فيها بالخلع من زوجها، بعد زواج استمر لمدة شهر واحد، نتيجة لما تعرضت له من ضرر نفسي ومعنوي».

وتابعت الزوجة البالغة من العمر 27 عاما بأنها تزوحت بعد قصة حب دامت لـ3 سنوات، بعدما تعرفا على بعضهما في مناسبة خاصة لأحد الأصدقاء، «وليد جوزي عنده شركة لحوم مجمدة، حالته المادية كويسة جدا، ومناسبة لمستوى أهلي، عشان كده هما معترضوش على جوازنا، واللي خلاني وافقت عليه إنه شخص بيحب الحركة والنشاط، والخروج الكتير، لكن بعد الجواز حاله اتشقلب».

«بعد أول أسبوع جواز جوزي أصبح شخص كسول، مش بيعمل حاجة في حياته غير الأكل والنوم والتلفزيون، اتكلمت معاه أكتر من مرة إن كده مش هينفع، ولازم ع الأقل ينام في أوضة النوم، قالي إنه بيرتاح ع الكنبة، نزلت وروحت لبيت أهلي ملاحظش حتى إني مش موجودة».

وأضافت الزوجة أمام محكمة الأسرة بأن والدها زاره كي يحاول حل الخلاف ولكن زوجها طرد والدها وصمم على البقاء بمفرده في المنزل، ورفض أي حلول ودية، أو حتى الطلاق الودي، لذا قررت الزوجة اللجوء لمحكمة الأسرة بعدما استشعرت استحالة الحياة بينها وبين زوجها، ورفعت دعوى خلع ولا تزال منظورة أمام المحكمة لم يتم الفصل فيها حتى الآن.