الورقي
أول تعليق من تامر حسني بعد الهجوم عليه بسبب إعلانه الأخير
علق الفنان تامر حسني علي هجوم عليه في الأيام الماضية من متابعيه بسبب إعلانه إلى شركة شيبسي.
رد تامر حسني
وكتب تامر عبر صفحته الرسمية على موقع التواصل الاجتماعي فيس بوك:" مساء الخير عليكم.. بقالي يومين بتابع اللي بيحصل واحترامًا للجميع.. انا بوضح حاجه بخصوص إعلان شيبسي الاخير".
وأضاف تامر حسني في رده: "اولًا.. انا على قوة الشركة من سنتين قبل أي أحداث وده مش اول إعلان ده ثالث إعلان في عقدي، معلش احيانًا الكلام عند بعض الناس بيبقى سهل وتحديدًا لما بيكون دون علم بالعقود وبحيثيات الموضوع كله.
وتابع: "ثانيًا.. أنا مضيت على عقد مكتوب فيه ان شيبسي شركه مصرية ولها سجل تجاري ضريبي مصري منفصل والبند قدامكم اهوه لصدق كلامي".
وواصل قائلا: “ثالثًا.. والاهم لاي حد بيشكك في انتمائي للقضيه الفلسطينيه هقوله انا من ٢٠ سنه وانا في ضهر القضية ومش كلام وأغاني بس لاااااا …. انا روحت بنفسي معبر رفح اثناء الضرب لمساندة اهالينا هناك بأكبر حملة معتقدش في حد هيخاطر بحياته ويروح بنفسه معبر رفح اثناء الضرب مجامله مثلًا …!!”
واختتم: "اخيرًا.. أنا لما قررت أكون الوجه الاعلاني لشيبسى من سنتين لأنه منتج مصري كل المصريين بيحبوه و البطاطس من الفلاحه المصريه وبيتباع في مصر بس واتربينا عليه والأهم أن الشخص البسيط يقدر يشتريه في ظل ظروفنا الاقتصادية وأظن ده واضح في الإعلان.. ده كان شعوري الشخصي اتجاه الحملة وأنا بمضيها من سنتين عشان كده كان واجب عليا التوضيح للجميع وللّي مش واصلاله الصوره بكل احترام.. وشكرًا لكل اللي ردوا عني وهما مغمضين حقيقي انتوا نعمه كبيره من ربنا ألف شكر ورمضان كريم على الجميع".
