هالة صدقي: صلاح السعدني أكتر فنان اشتغلت معاه في حياتي وغيرنا نهاية "أرابيسك" بسبب الجمهور

حكت الفنانة هالة صدقي ذكرياتها مع الفنان الراحل صلاح السعدني، والنجاح الكبير الذي حققاه في مسلسل "أرابيسك"، لافتة إلى أنها شاركت الراحل في أكثر من 15 مسلسل.

وقالت هالة صدقي خلال مداخلة هاتفية في برنامج "أسرار النجوم" مع الإعلامية إنجي علي عبر إذاعة وقناة "نجوم FM": "صلاح السعدني أكتر فنان أنا اشتغلت معاه في حياتي عاملين مع بعض تقريبا 14-15 مسلسل دا غير الإذاعة، كنا بنرتاح جدا في الشغل مع بعض كنت بفهمه من نظرة عينيه عايز إيه".

وأضافت: "من كتر ما الناس حبتنا مع بعض النهاية بتاعة أرابيسك اتغيرت، لأن العرض في الوطن العربي كان سابق العرض في مصر، اتذاع في النسخة اللي اتعرضت في الوطن العربي إن "توحيدة" متجوزتوش، لكن في مصر عملنا مشهد إضافي إن توحيدة اتجوزت حسن من كتر ما كانوا الناس بتحبه".

وتابعت هالة صدقي: "أنا في ذكريات كتيرة مع صلاح السعدني، أول حاجة عملتها معاه كان الأب العازب ودا كان تاني مسلسل ليا في حياتي، عملت معاه أرابيسك وعمو عزيز ودمار شامل، دا الممثل الوحيد اللي اشتغلت معاه بهذا الكم من كتر ما الناس حبتنا مع بعض، وأنا اتعلمت منه كتير، اتعلمت صفاء النية ونضافة القلب، كان دايما يشجعني على الشغل وإني أسيبها على ربنا وهو يكتبلي الخير".

واختتمت هالة صدقي: "صلاح السعدني هو النموذج للفنان المثقف، إنسان بسيط وعنده كاريزما جميلة وبيحب الخير للكل، أنقى قلب أنا اتعاملت معاه في الوسط الفني".