آيتن عامر: بفضل الأعمال الكوميدية عشان بحب الفرفشة وأكرم حسني ميتشبعش منه
![آيتن عامر](images/no.jpg)
كشفت الفنانة آيتن عامر كواليس أعمالها الفنية ونجاحاتها في الأعمال الدرامية والسينمائية التي قدمتها خلال سنوات في مسيرتها الفنية.
وقالت آيتن عامر خلال استضافتها في برنامج "ساعة سعادة" تقديم دكتور باهي هاني ودكتورة نورهان معتمد والذي يعرض على شاشة قناة هي: "أكتر الأعمال القريبة من قلبي في الدراما هو حضرة المتهم أبي والدالي أما في السينما ياتهدي يا تعدي وعلي بابا، وبختار المسلسلين دول لأنهم أكتر أعمال عرفوني بالجمهور وكان تعارف على قدر عالي من الجودة والعملين كان ليهم صدى عظيم".
أما عن كواليس مسلسل "مكتوب عليا" قالت آيتن عامر: "أكرم حسني وأحمد فهمي من أكثر الفنانين اللي بحب أشتغل معاهم، لأنهم مش أنانيين وعايزين كل اللي حواليهم يبقوا كويسين وكلهم يبقوا في أحسن حالاتهم ويقولوا افيهات مظبوطة".
وأضافت: "مكتوب عليا من أهم الخطوات اللي اخدتها في حياتي ووقتها كان معروض عليا "من شارع الهرم إلى" ودا كان مسلسل مصري كويتي ولكن الظروف عارضتنا شوية فكنت بعمل مسلسل اسمه أولاد عابد وكان معنديش وقت غير لمسلسل واحد بس جمبه وبسبب لغبطة في المواعيد اضطريت اخد مكتوب عليا ولكنه نجح نجاح باهر والدور والأغنية علموا جدا مع الناس ولحد دلوقتي بتشتغل في كل حتة وبصراحه الشغل مع أكرم حسني ميتشبعش منه ابدا".
وتابعت آيتن عامر: "بيفرق معايا أوي العمل اللي بقدمه من حيث هو هو كوميدي ولا دراما لأنه بينعكس على حالتي النفسية بشكل مش طبيعي، لما بعمل مسلسل كوميدي ببقى مفرفشة ومهيصة وحابة الحياة ولما بعمل دور في كآبة وفيه معاناة هتلاقيني شكلي اختلف والمود بيتأثر جدا حسب الدور اللي بعمله فتلاقيني بميل أكتر للأعمال الكوميدية".