ريهام سعيد: محمد هنيدي كان عايز يتجوزني وأهلي رفضوا

كشفت الفنانة والإعلامية ريهام سعيد، لأول مرة تفاصيل تقدم النجم محمد هنيدي للزواج منها، لافتة إلى أن أسرتها رفضت.

وقالت ريهام سعيد خلال لقائها في برنامج "كتاب الشهرة" من تقديم علي ياسين عبر قناة "الجديد": "اتقدملي فنان من الفنانين ووالدتي رفضت، ودي أول مرة أقولها في حياتي" مضيفة: "هو محمد هنيدي، أنا أهلي موافقوش عشان هو ممثل كانوا خايفين ياخدني معاه في التمثيل".

وتابعت: "كنت صغيرة في الجامعة الأمريكية كنت 19 سنة مثلا في أول سنة في الجامعة، وطلبوا مننا أن نعمل لقاء مع ممثلين وأنا كنت بحب مسرحية (حزمني يا) رحت المسرح عشان أعمل انترفيو مع أي حد، مين اللي رضي يعمل معايا كان محمد هنيدي".

واستكملت ريهام سعيد حديثها قائلة: "رحت وقفت على باب المسرح أنا وواحدة صاحبتي هي رولين القاسم، كان المساعد بتاعه اسمه جودة طلبت منه أن ندخل نعمل انترفيو، عرفت بعدها أنه أعجب بيا لما كلمني وقالي إنه عايز يتقدم ليا وأنا فرحت جدا هو نجم وكان عامل فيلم (إسماعيلية رايح جاي) ومكسر الدنيا".

وتابعت: "جيه على البيت وكان جايب هدايا كتير أوي كان لسه راجع من أمريكا، مامتي قالت له هنفكر، وبهدلتني أنا، بالنسبة لأمي المجال دا سمعته سيئة هتأخر برا وممكن حد يبوسني في فيلم، ورفضت".