أسرار بلاغات و«خناقات» شيرين عبدالوهاب وشقيقها في المحاكم

مازالت النجمة شيرين عبد الوهاب تعيش حياة محاطة بإثارة الجدل، بداية من زواج وانفصال وإدمان وخضوع للعلاج النفسي، وآخر تلك الأزمات التي تعيشها الفنانة هو تسريب صوتي للفنان حسام حبيب، طليق "شيرين" يتحدث خلاله عن معاناة الأخيرة من استغلال أهلها لها.

ومن الواضح أن أزمة شيرين عبد الوهاب الأخيرة استفزت العديد من أصدقائها داخل الوسط الفني وعلى رأسهم النجم تامر عاشور، الذي علق على تلك الأزمة قائلًا: "كل اللي أقدر أقوله في موضوع شيرين عبد الوهاب إن مفيش كلمه واحده بس من اللي اتقالت وانتشرت صح أنا قريب من أهل شيرين ووالدتها وأخوها".

وأضاف، خلال حسابه الرسمي على منصة إكس X: "أنا برضه أقولها إني بحبها وكل الدنيا بتحبها وتحب فنها، أهل شيرين مظهروش فى حياتها آخر سنتين ثلاثة أهل شيرين هم أهل شيرين من زمان كل نجاحات شيرين كانت وسط أهلها وناسها اللي يشيلوها من ع الأرض شيل".

وتابع: "يا رب يبعد عنها كل خبيث وأناني وفاشل وممثل، هي أطيب منهم كلهم وهم اللي وقعوها فكل مشاكلها "أنت بمن حولك" لو اللي حواليك فشلة غصب عنك لازم تبقى زيهم وتعافر علشان تقدر تمارس اللي كنت بتعمله في عدم وجودهم بمنتهى السهولة".

واختتم تامر عاشور: "أنا كلت عيش وملح ف بيتها وف بيت أمها وأخوها وكان لازم أقول الكلام ده علشان الكلام ده هو الكلام الحقيقي ولا كلمة من اللي اتقالت واتسمعت ليها أساس من الصحة، أهل شيرين هما هما أهل شيرين من زمان قوي».

ومن جانبها، تقدمت النجمة شيرين عبدالوهاب، ببلاغ للمستشار محمد شوقي عياد، النائب العام، ضد شقيقها محمد عبدالوهاب، متهمةً إياه باستغلال توكيل قديم ممهور بتوقيعها الشخصي وتعاقد مع المنتج محمد الشاعر دون علم منها.

وأفادت في بلاغها، بأن أخيها لم يكتفِ بذلك بل استولى على حساباتها الشخصية بمواقع التواصل الاجتماعي دون الحصول على إذن منها، وبناءً عليه تصرف في حقوقها بما لا يليق باسمها.

وقالت شيرين عبد الوهاب، في بيان لها: "أنا فوجئت بالي حصل على السوشيال ميديا من محمد أخويا وحسام وحبيت، وأردت التأكيد أن كلام حسام مظبوط جدًا وأخويا فعلًا باعني".

وأضافت: "التصريح اللي نزل نزل من محامي محمد اللي مستولي على السوشيال ميديا ومضاله على عقد بيخليه يستفيد من السوشيال ميديا بتاعتي، وفيه أغاني جميلة جدًا جدًا عاملينها وشوية حاجات بتخلص عشان المشاكل مع الشركة المنتجة، لأن في حد كمان قاصد يقعدني في البيت وبنخلص الحاجات دي".

ليخرج محمد عبد الوهاب، شقيق النجمة شيرين عبد الوهاب، عن صمته ويرد على تصريحات «شيرين» والتي أكدت خلالها على أنه غدر بها وباعها»، على حد وصفها.

وكتب محمد عبد الوهاب عبر حسابه الشخصي على موقع التواصل الاجتماعي «فيسبوك»: «كل واحد عنده قدرة على تحمل الأذى لكن للقدرة دي حدود».

وأضاف شقيق شيرين عبد الوهاب في منشوره: «ده قرار النيابة العامة بالحفظ إداريًا في كل الاتهامات اللي اتوجهت ليا بتاريخ ۱۹/۱۲/۲۰۲۲ يعني من سنتين.. إيه هي بقي الاتهامات دي؟ كسر الضلع والعشرين راجل اللي دخلت بيهم على أختي! وطبعا موضوع السكينة! واتسألت على التوكيل بتاعي وبتاع أمي من وكيل النيابة المحترم وكله مثبت، س سؤال ج جواب. التوكيل اللي بتقول إن أنا أسأت استخدامه!».

وتابع: «وده إن دل على شيء فهو يدل على إني مش عايز أختي شكلها يبقي وحش قدام الناس وقدام جمهورها والأهم  أمي اللي كنت  مفهمها إن بنتها اتنازلت وأنا  أستحمل أي حاجة إلا إنها تتوجع في ولادها. وبناء عليه رضيت بالظلم لوحدي لكن الحقيقة غير كده، أنا اتطلبت في النيابة واتسألت رسمي وتم إخلاء سبيلي من النيابة على ذمة القضية لحد ما تحفظت القضية بس أنتي بقى بشطارتك وبأهل الشر اللي حواليكي اللي خسروكي نفسك وأهلك».

واستكمل محمد عبد الوهاب: «خليتيني انهارده أطلع أقول جزء من الحقيقة للناس رغم إن ده آخر حل كنت أحب ألجأ ليه. وده حق ربنا لا ظلم ولا افترى. ونفس الكلام اللي من سنتين بيتعاد تاني معرفش لمصلحة مين مع إني بعيد عنك وعن حياتك من سنين قبل الواقعة وسنتين من بعدها.  ده قرار النيابة العامة الموقرة في الافتراءات اللي اتوجهتلي، مش بيان من محامي. وأي حاجة هرد بيها هتكون مستند حكومي عليه ختم النسر».

واختتم في منشوره: «مرفق هنا الفيديو بتاريخ ١١/١١/٢٠٢٢ اللي قولتي فيه انك اتنازلتي ولعبتي دور الضحية، ومرفق برضو المستندات الرسمية اللي بتثبت إن القضية فضلت شغالة وكنتي هتتسببي في حبس أخوكي ظلم وهو لحد آخر لحظة بيحاول يحميكي ويحمي أمك  ويحمي بناتك».