مرام تطلب طلاق الضرر بمحكمة الأسرة.. والسبب «العمل»

«7 سنين شايلة فيهم مسئولية البيت والعيال، وهو زي قلته، حلمت أعمل بيت سعيد بس الحقيقة المشاكل هي اللي ظهرت»، كلمات وقفت بها الزوجة "مرام. ن" أمام محكمة الأسرة تطالب بطلاقها للضرر من زوجها، بعدما عاشت في كنفه حياة تعيسة على حد قولها.

البداية طانت بزوجة تقف أمام قاضي محكمة الأسرة، تسرد معاناتها التي تعيش فيها من بداية الزواج مع رجل خلف بكل وعوده معها وتحول لشخصية بعيدة تمامًا عن الذي رسمتها في بالها، «كنت فاكرة هيعيشني ملكة زي ما هو كان بيقولي قبل الجواز بس كنت غلطانة لما صدقته، عشان اتجوزت من هنا ولقيت واحد تاني خالص معايا، ولقيت نفسي بصرف وشايلة البيت وهو ميعرفش عن البيت أي حاجة خالص».

وتابعت الزوجة في دعواها أمام محكمة الأسرة، بأنها وجدت نفسها فجأة هي الرجل، ومسئولة عن المنزل بمفردها وهروب الزوج من المسئولية،«كنت فاكراه راجل وبيتحمل المسئولية بس من أول الجواز وهو قاعد في البيت على طول من غير شغل، وأنا طبعا اللي بقيت بصرف على البيت، وبلف على البيوت وبمسح السلالم عشان أعرف أصرف على البيت والعيال، وهو ولا هو هنا وبرضو مش عايز يشتغل خالص ولا يعمل أي حاجة خالص».

وأضافت الزوجة في دعواها أمام محكمة الأسرة، بأنها ظنت أن الوضع سيتبدل ولكن في الحقيقة أنه لم يجد أي جديد، واستمرت الزوجة المسئولة عن المنزل والأولاد دون أي تدخل منه ما جعل الخلافات تتصاعد بينهما، وبعد 7 سنوات على هذا الحال قررت قصد محكمة الأسرة وإقامة دعوى طلاق.