رد لاذع من شقيق شيرين عبدالوهاب على تصريحات حسام حبيب: امك اطردت قدامك وشوفنا فضايح أبوك

علق محمد عبد الوهاب، شقيق النجمة شيرين عبدالوهاب، على التصريحات الأخيرة التي أدلى بها الفنان حسام حبيب في إحدى اللقاءات التليفزيونية، بعد أن اتهمته طليقته "شيرين" بالسرقة واستيلائه على مجوهرات ومبالغ مالية طائلة منها.

وهاجم محمد عبد الوهاب، حسام حبيب طليق شقيقته قائلًا: "انت طالع تقول أنا متربي وعيلتي احسن ناس ده انت امك اتطردت قدامك الساعة ٤ الفجر بعد ٣ ايام جت البيت  عندها هي واختك عادي وكأن مفيش حاجة حصلت زيرو كرامه بالوراثة وابوك أنا وانت اتفرجنا علي فضايحه مش عايز أفسر عشان الناس متقرفش اكتر ماهي قرفانه عيلة ايه يا لوسي يا سبوبه انت فاكر الناس بتصدق الهبل ده طب ماتقول كده للناس العيلة دي بتصرف منين ولا أوريهم أنا بالصوت والصورة".

وكان حسام حبيب، قد صرح لـ ET بالعربي قائلا: "الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت واستحملت إهانات بقالى سنين على حاجات محصلتش، وعمري ما اشتكيت ولا اتكلمت ولا دفعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ماحصلت بالظبط، أنا عمري ما طلعت أسرار حد بره ولا عمري ماكنت هعمل كده، بس خلاص أنا اضطريت لكده، الحياة مش بالعافية أنا مش عايز أرجعلها".

وأضاف: "وأنا اللى بستنجد بالناس وبقولهم نجمتكم الكبيرة اللى بتحبوها من سنين كتيرة، عايز أبعد عنها ومش عارف، أتصرف إزاي وأستنجد بمين، وأنا بدعي ربنا قدامكم أهو يارب عايز أبعد عنها يارب ومش عارف أعمل إية، أنا تعبت بجد وسنين من الظلم والإهانة وبسكت ومبردش، وكل الكلام اللي كانت بتقوله غلط كله، هو في حد يكون ضارب حد وفتحله دماغله، ويعتذرله عادي، وقبلها كنت حالق شعرها وتعتذرلي عادي، ويرجعله تاني، هو في حاجة اسمها كدا".

وعن اتهامات شيرين عبدالوهاب بتهديده لها: "بتقول عشان بهددها! بهددها بإيه دا اللي هي قالته للناس أقوى من أي تهديد، أي اللي عندي أهدده به، وأقول ربنا كبير لحد ما أظبط ورقي وأكلم المحامين بتوعي عشان أعرف أخد حقي ومش هتنازل المرة ديت خالص، وهاخد حقي بالقانون لأني عملت حساب للعشرة أكتر من مرة، وكل مرة بيطلع أكتر من اللى قبله، أيام مكلمة لميس الحديدي وطلعت قالت شتائم وحاجاة في حقي، كفاية كفاية يا ناس".

وعن الاتهامات بسرقته خزنة شيرين عبدالوهاب، قال حسام حبيب: "أنا عايز أعرف إزاي سرقتها، هل دخلت وأنا لابس طاقية الإخفاء، ومحدش شافني، وكل مرة سرقة وكلام أقل بكتير من أني أعلق عليه، كل شوية أنا صرفت وعملت، وأنا بستنجد بكل الناس ارحموني منها، دا ذنب أنا عملته في حياتي أنا مش عارف إية دا، ولسة هطلع أتكلم كمان بكل التفاصيل، ومش بقول كدا عشان خاطر أخوفها، لا دا حقي، عشان كل شوية يتقال كلام عني وعن أهلي، وأنا مش بشكر في نفسي الحمدلله متربي ومن عيلة كويسة جدا، ومتربي في أماكن كويسة ومتعلم في مدارس كويسة جدا، وبعرف ربنا سبحانه وتعالى".

وتابع حسام حبيب: "وعايز أقول للناس كلها شيرين عبدالوهاب بتستقوى بيكم، ودائما بتهددني عشان لو معملتش حاجة، تقولي مش هخليك تمشي في الشارع، فأرجوكم بالله عليكم بلاش تمشوا مع حد عايز يظلم حد".