المسامح كريم.. تامر حسني يقبل اعتذار شذى

وجهت الفنانة شذى اعتذارًا للفنان تامر حسني، بعدما صرحت مؤخرًا بأنه ضيف شرف في حياتها وأنه اختفى من وقت وفاة والدها ووالدتها.

ونشرت شذى صورة تجمعها بـ تامر حسني في حفل بالساحل الشمالي وعلقت عليها قائلة: "من غير ما افكر واحاول ارتب الكلام انت اكتر واحد في العالم عارف حبي ليك قد ايه واكتر واحد برضوا عارفني وعارف اني على الله حكايتي ودماغي بتسوحني كتير".

وأضافت: "حقك عليا ودايما العتاب بيكون على قد الغلاوه وعلشان غلاوتك كتير هبت معايا زياده متزعلش مني وهتفضل صاحب عمري اللي عدينا مع بعض كتير الوحش قبل الحلو love you الحلو يا وش قفص قلبي".

ورد تامر حسني: "ولا يهمك يا أوزه كفاية إنك كتبتي الكلام الجميل ده ربنا يوفقك ويسعد قلبك يارب المسامح كريم".

لترد عليه شذى: "روح قلب أوزه تستاهل كل حاجه حلوة والله يا أبو قلب أبيض وحلو زيك".

وتعود تفاصيل الأزمة إلى حديث شذى عن تامر حسني خلال لقائها في برنامج "أنا سعيد"، الذي يقدمه الإعلامي سعيد جميل، عبر قناة "القاهر والناس" حيث قالت وقتها: "سيرة تامر حسني بتقلبلي مزاجي، مش عشان أنا مبحبوش لأ أنا بحبه جدًا وإحنا عشرة سنين، ولكن تامر من وقت وفاة أبويا وأمي مظهرش، ولو ظهر بيظهر كضيف شرف، ومش بتكلم على الشغل أنا بتكلم على الإنسانية، أنا مليش حد هنا ومعنديش إخوات وكل عيلتي برا مصر".

واستكملت حديثها قائلة: "على المستوى الشخصي والمهني تامر ضيف شرف في حياتي، خاصة إني بتعرض لأزمات كتير في السوق وتغير الذوق، ولكن تامر في إيده إنه يصلحلي حاجات كتير وأنا أستاهل ده لأن الصحاب لازم يكونوا ضهر لبعض، خصوصا لو أنت كنت كويس معاه قبل كده، عشان كده بزعل لما بتيجي سيرة تامر، لأني مكنتش مستنية منه حاجة كنت مستنية يسأل عليا".