مفاجأة.. تفاصيل مكالمة أحمد السقا لأبطال مسلسل "عمر أفندي"

عبر الفنان أحمد حاتم عن سعادته البالغة، بعد مكالمة النجم أحمد السقا له ليخبره بأنه يشاهد مسلسله الجديد "عمر أفندي" الذي حقق نجاحًا كبيرًا منذ عرضه.

وقال أحمد حاتم خلال لقائه وأبطال مسلسل "عمر أفندي" في برنامج "معكم" مع الإعلامية منى الشاذلي: "من أجمل المفاجآت في مسلسل عمر أفندي هي أحمد السقا علاقتي بأحمد بدايتها كانت في فيلم السرب كنا ضيوف شرف فجه يومها سلّم علينا وأيه يا شباب ما شاء الله عليكم لكن قبلها ماكنتش أعرفه ومش صحاب يعني".

وأضاف: "المهم لما اتعرض عمر أفندي بقى يكلمني من أول حلقة لآخر حلقة كل يوم.. وبعدين المسلسل مكنش بيتعرض يومين في الأسبوع فبقى يكلمني فيهم يقولي يا معلم أنا فتحت مسلسلك اللي اسمه (أنا وهي) وبتفرج عليه.. يوم تاني يكلمني يقولي أنا بتفرجلك على فيلم (الغسالة) لحد ما المسلسل ييجي، حقيقي بسطني جدًا".

ومن جانبها، كشفت آية سماحة عن مكالمة أحمد السقا لها أيضا، قائلة: "وكلمني أنا كمان، أنا عمري ما كلمت أحمد السقا وهو شبه بابايا الله يرحمه أوي يعني لو شوفته في الحقيقة ممكن أنهار، المهم فيه يوم لقيت حد بيكلمني وبيقولي أنا مبسوط بيكي أوي أوي وكلام حلو كتير فبقوله مين معايا؟ قالي "معاكي الممثل الشاب أحمد السقا" وضحك".

واستكملت آية سماحة حديثها: "قعدت أصوت في العربية وجوزي جمبي يقولي بالراحة متبينيش إنك عبيطة أوي عشان مايتخضش منك بس فعلا مكالمته فرقت معايا أوي".

وتابع المخرج عبد الرحمن أبو غزالة في ذات السياق، قائلًا: "هو طول الوقت كان في ضهري وبيشجعني وكان شايف أن ربنا هيكرمني.. فهو جدع جدًا جدًا بجد، ليرد عليه أحمد حاتم قائلًا: اه السقا طلع ابن بلد وجدع بجد بقى".

أبطال مسلسل عمر أفندي

يضم مسلسل "عمر أفندي" مجموعة كبيرة من الفنانين وهم: أحمد حاتم، آية سماحة، محمود حافظ، مصطفى أبو سريع، محمد رضوان، أحمد سلطان، ميران عبد الوارث، إسماعيل فرغلي، رانيا يوسف، والأطفال: جان رامز، دالا أحمد، وياسين إسلام.