"غيرة مطرب".. تامر حسني يكشف سبب نجاحه في كتابة وتلحين أغانيه

وجه النجم تامر حسني، رسالة إلى جمهوره يحثهم من خلالها على عدم التأثر بالانتقادات، بل بالعكس تحويلها إلى نجاح، وكشف "حسني" سبب نجاح في كتابة وتلحين أغانيه.

تامر حسني 

ونشر تامر حسني مقطع فيديو مجمع من أغانيه، الذي قام بكتابتها وتلحينها، وذلك عبر حسابه الشخصي بموقع تبادل الصور والفيديوهات الشهير إنستجرام، وعلق قائلا: “زمان وأنا ببدأ حياتي مكنتش ناوي إني أصمم أكتب أغانيا وألحنها”.

وأضاف: “عملت أول لحن في حياتي لأغنية اسمها راحت حبيبتي في ألبوم تامر وشيرين وأنتم عارفين الألبوم ده إزاي نجح وكل أغانيه نجحت وكانت الأغنية كلمات الشاعر الكبير بهاء الدين محمد، طلع صحفي ينتقدني وكتب هو أنت لحقت تنجح عشان تلحن، فسألت نفسي هو كتب كده ليه مع إن الأغنية من أنجح أغاني الألبوم وأكثر أغنية ساعتها أثرت في الشباب، فسألت هو مين الصحفي ده طلع صاحب مطرب معين فعرفت إنه يمكن يكون غيران شويه وخلاص”.

واستكمل: “بعد شوية نزلت أغنية عيونه دار وكسبت مسابقة كبيرة جدًا في مصر ساعتها على نجوم اف إم وأخدت لقب أغنية القرن فطلع نفس الصحفي كتب أنت مصمم تلحن ليه تخيلوا أغنية حاصلة على لقب أغنية القرن وبتتحارب”.

ثم أوضح تامر حسني كيفية تأثير انتقاد الصحفي عليه، قائلًا: “من هنا خدني الحماس أدور جوه نفسي وأركز جامد إني أغيظه ومش بس ألحن لاء أنا هلحن وهكتب أغانيا، وفعلًا من قلبي بشكر الصحفي والمطرب اللي خلاه يكتب كده لأن لولاهم مكنتش عملت الأغاني اللي هذكرها دي ومكنتش هبقى في مكانتي دي”.

وتابع: “ياريت تركزوا إنهم كلهم كلامي ولحني عشان في ناس كتير متعرفش، نور عيني، كل مره، لما بتكون بعيد، أنا مش عارف اتغير، يا بنت الأيه، قسمة ونصيب، هي دي، أنا ولا عارف، يا تاعبني، ضحكتها مبتهزرش، ماتوصينيش، إرجعلي، ميحرمنيش منك، الله يباركلي فيك، صوتِك، بغير عليها، اسكتي، حرقة دم، زي الأيام دي، تليفوني رن، سي السيد، 100 وش، هدلعني، come back to me”.

كما وجه رسالة للشباب: “طبعًا لسه في أغاني كصير بس دول اللي حضروا في ذهني دلوقتي ولما لحنت وألفت لغيري كانوا أغنيتين، قوم أقف وأنت بتكلمني لـ بهاء، وبص بقى لـ شيرين، كل دول كلماتي وألحاني تخيلوا بقى قد إيه الصحفي ده، والمطرب اللي زقه عليا فادوني في مستقبلي قد إيه كلمة جارحة المقصود منها تحطيمي بكرم ربنا أقدر أحوّلها لأحد الأسباب اللي تخليني أنجح وأكمل 20 سنه من كلامي وألحاني بكتب البوست ده عشان عارف إن كثير مننا بيسمع كلام مُحبط كل يوم فـ بلفت نظره أنه عنده فرصة كل يوم أنه يسمع كلمة تضايقه عشان يحولها لطاقة نجاح عظيمة تفرق في مستقبله وحياته”.