بعد أدائها عمرة للسندريلا.. بسنت صيام: "وعدت ووفيت يا ست سعاد"

كشفت الفنانة بسنت صيام ابنة النجم أحمد صيام، عن سبب أدائها عمرة للنجمة الراحلة سعاد حسني، منذ أيام قليلة، وذلك بسبب وعد كانت قد أخذته وهي صغيرة.

بسنت صيام عن سعاد حسني: حبي ليها مش حب عادي

وقالت بسنت صيام، عبر حسابها الشخصي بموقع تبادل الصور والفيديوهات الشهير إنستجرام: "العمرة التانية اللي عملتها كانت لسعاد حسني،
وعد كنت وعدته من وأنا صغيرة أن أول ما ربنا يكتبلي عمرة هعملها واحدة".

وأضافت بسنت عن السندريلا: “حبي ليها مش حب عادي، اللي يعرفني عارف أن بيتي كله صورها عندي لبس وشنط وحاجات كتير عليها صورها، أنا حبيت الفن منها وأنا صغيرة كنت عايزة أمثل عشان أمثل أفلامها بس، مش هو ده الحب أنا بحبها اللي هو دايمًا بترحم عليها وأدعيلها وأقرالها قرآن وطول عمري شايفة إني معنديش هدية أكبر ولا أحلى من العمرة أهديها بيها، والحاجة الوحيدة اللي ممكن تكون هي محتاجاها وكمان هي معندهاش أولاد وللأسف على قد ما الناس كلها بتحبها الناس مبتفتكرش تترحم ولا تدعي للفنانين معرفش ليه”.

واستكملت: "أنا مكنتش ناوية أتكلم في الموضوع ده، عشان دي حاجة بيني وبينها وبين ربنا، بس بقالي شوية بضايق وبستغرب أوى إزاي الناس تكون بتحب فنان أو فنانة أوي ويجروا عشان يتصوروا معاهم، وفي نفس الوقت يقطعوا فيهم ويشتموهم ويستحلوا الكلام في عرضهم كده، بجد حاجة مخى مش فاهمها
وكله كوم بقى ولما يبقى الكلام ده على حد أتوفى والفكرة أن دايمًا الناس دي بتتكلم بالدين طب ده حتى الدين بيقول أذكروا محاسن موتاكم".

واختتمت بسنت صيام رسالتها، قائلة: “نفسي تاخدوها حاجة كدة وإنتوا بتتفرجوا على التليفزيون ولقيتوا ممثل بتحبوه وتوفى خدوا عشر ثواني اقروله الفاتحة ولو يا سيدي شايف أن اللي بيعمله حرام قول لنفسك كده معناه أنه محتاج الدعوة أكتر، ربنا يرحمك يا زوزو ويتقبل مني ويجعلها في ميزان حسناتك يا رب”.

وكان الفنان أحمد صيام، كشف مؤخرا، عن أنه يرفض التدخل في إختيارات ابنته بسنت صيام في أعمالها، لكنه قام بتربيتها على أكمل وجه وينصحها في أشياء معينة لها علاقة بالتربية.