الورقي
«مش عايزة أكلمها تاني».. ريهام سعيد تكشف تفاصيل خلافها مع عبير صبري
هاجمت الإعلامية ريهام سعيد الفنانة عبير صبري بعد موقف حدث بينهما دفعها لقول إنها لا تريد التحدث معها مرة أخرى.
الأزمة الأخيرة
وحكت ريهام سعيد في لقاء مع et بالعربي عن نجمات وقفن معها في أزمتها الأخيرة بعد اتهامها لطبيب تجميل بتشويه وجهها وظهورها بشكل مختلف، وما فعلته معها عبير صبري.
وقالت ريهام سعيد: "أكتر حاجة أنا كسبتها في الأزمة دي هي الفنانين اللي مكنش ليا علاقة بيهم وبقوا أصحابي جدا دلوقتي، وكلهم عندهم خلق غير طبيعي يعني أنا عشان أجيب نمرة حد معرفوش وأكلمه وأسانده وأفضل أكلمه مرة واتنين وتلاتة، وأديله نمرة دكتور دي ناس كويسة أوي، يعني ريهام عبد الغفور كنت أعرفها من قبل لكن مش قريبين زي دلوقتي ست محترمة أنا مسمياها ملاك، وريهام حجاج، ورضوى الشربيني حاولت تشوفلي دكتور يمكن لما آخر مرة ودتني لدكتور وعرفت أن مفيش حل بطلت تتواصل أوي".
وتابعت ريهام سعيد: "لما بقابل ناس كتير بيشجعوني ويقولولي إنتي قمر، مفيش غير واحدة بس جرحتني جرح فظيع مش المفروض أقول اسمها إحنا أصحاب واشتغلنا مع بعض، هي قابلتني وقالتلي كلمة ضايقتني أوي، قالتلي ما إنتي كويسة أهو، كنت رايحة حفلة على البحر وشفتها أنا الوحيدة اللي حاطة مكياج، قالتلي ما إنتي كويسة أهو إنتي دراما كوين بتحبي تعملي دراما، أنا سبت الحفلة وركبت عربيتي وفضلت أعيط".
دراما كوين
وأكملت ريهام سعيد: "كنت عايزة أقولها لو تعرفي كم الألم اللي فيا وإنتي بتحافظي على نفسك ووشك أوي، هي عبير صبري بقول اسمها عشان أنا مش عايزة أكلمها تاني، مش من واجب حد أنه يقف جنبي لأن مفيش حاجة يقدروا يعملوهالي لكن إن تقل خيرا أو لتصمت لو مش قادرة أدعمك متقوليش إنتي دراما كوين، أنا عملت دراما قبل كده في إيه أنا واحدة اتسجنت ومطلعتش بعدها أعيطلكم وقفت سنة ورجعت أقوى من الأول، عندي كم من حاجات اتظلمت فيها أوي وعمري ما فتحت الموضوع فين أنا دراما كوين؟".
