لأول مرة.. نجلاء بدر تكشف كواليس مشاركتها في فوازير "فطوطة" مع سمير غانم

كشفت الفنانة نجلاء بدر لأول مرة تفاصيل مشاركتها في فوازير "فطوطة" مع النجم الراحل سمير غانم، وبداية مشوارها الفني.

وقالت نجلاء بدر خلال لقائها في برنامج "ساعة ونس" مع مراد مكرم عبر قناة CBC سفرة: "شاركت في فوازير فطوطة مخرج أنتيكا، وأنا مامتي كانت مدير عام قسم أزياء في التليفزيون المصري وكانت هي اللي بتعمل أزياء الفوازير ومسلسل رأفت الهجان وغيرها، كنت بروح معاها ولما شافني المخرج فهمي عبد الحميد قالي هعمل بيكي فزورة، وأنا سمير غانم كان عشقي كان بالنسبة ليا فطوطة بالبدلة الخضراء.

وأضافت: "كانت فزورة فيلم دهب وكان أول مرة أقف قدام كاميرات، أنا كنت عملت مشهد زمان في فوازير نيللي بس مش فاكراه، لكن هنا تمثيل وغناء واستعراض، أنا كنت لمضة وأنا صغيرة وفرحانة بالكاميرا والممثلين، وسمير غانم دربني على الحركات وكنت بقلده".

وأوضحت نجلاء بدر: "اختفيت وكملت دراستي وبعدها رجعت في مسلسل النوة مع استاذ محمد فاضل وفردوس عبد الحميد وأحمد السقا ومحمد هنيدي".

واستكملت حديثها قائلة: "كان نفسي ابدأ ممثلة وادخل معهد فنون مسرحية قسم تمثيل، جبت مجموع كويس في الثانوية العامة بمجموع 96% ووالدي مكنش متخيل أني هنجح، وأصر أني أدخل كلية إعلام.. في الوقت ده كانوا بيصوروا مسلسل رأفت الهجان وكان بطولة إيمان الطوخي وإخراج يحيى العلمي وماما كانت ماسكة أزياء المسلسل.. وعديت على التلفزيون وقابلني يحيى العلمي وقالي هتدخلي إيه قولت له نفسي ادخل معهد سينما قالي طيب ما تدخل إعلام ما إيمان الطوخي خريجة كلية إعلام وبتشتغل ممثلة، وأنا مكنش في دماغي إعلام خالص، لكن هو قالي على الأقل يبقى معاكي شهادة وكان عنده حق لأنه قالي إذا منجحتيش ممثلة هتشتغلي إيه!".