الورقي
إيمان العاصي: لازم يبقى في قانون مش أي حد من حقه يخلف
تحدثت الفنانة إيمان العاصي عن بعض القوانين التي تتمنى أن يتم تعديلها أو حتى استحداثها إذا لم تكن موجودة.
تعديل بعض قوانين الأسرة
وقالت إيمان العاصي خلال لقائها في برنامج أسرار النجوم" مع إنجي علي عبر إذاعة "نجوم FM" إنها تتمنى تعديل بعض قوانين الأسرة.
وأضافت: "قانون نفسي يتحط أن يكون إجباري في دكتور نفسي يقعد مع المقبلين على الزواج، الجواز مسؤولية رهيبة، ولازم يبقى في قانون مش أي حد من حقه أنه يخلف، مينفعش إني يبقى أنا مش معايا قوت يومي وأروح أخلف، لازم يتعاقب دا عدل ورحمة، مينفعش أجيب مخلوق في الدنيا وأنا مش قادرة أكله وأوديه مدرسة وألبسه عشان أحس بالأمومة دي أنانية رهيبة".
وتابعت: "في قانون نفسي يتغير قانون تعنيف الأسرة، ربنا إدانا الأطفال هما مش أملاك دي أمانة في وقت من الأوقات بنسلمهم للحياة بعد ما نكبرهم ونربيهم ونعلمهم دا دورنا، لكن الأهالي اللي بتعذب عيالها، عذاب مينفعش يتحكي، اللي يفكر أنه يؤذي مخلوق معندوش قدرة يدافع عن نفسه وأي راجل بيضرب مراته نفسي يكون القانون يبقى عادل وقاسي جدا عشان محدش يفكر أنه ممكن يتحكم في حياة إنسان أو يعذبه".
وأكملت:" القانون اللي نفسه أشيله هيكون ليه علاقة بقانون الأسرة لأنه فيه ثغرات كتير، مثلا أم تخطف عيالها من أبوهم، أو أب يخطف العيال وميوريهومش للأم، القانون لو روحتي تقدمي بلاغ هيتقال مفيش أب بيخطف عياله، طبيعي لكن لكل قاعدة شواذ، في الحالة دي لما النيابة تتحرى هتعرف أنه خطف الأم أو الأب مش عارف يوصل لأولاده، نفسي يتحط قانون للأهالي اللي بيحرموا الأولاد من حياة طبيعية".
مسلسل برغم القانون
يذكر أن إيمان العاصي يعرض لها مسلسل "برغم القانون" عبر قناة ON ومنصة Watch It.
مسلسل "برغم القانون" يشارك في بطولته كل من هاني عادل، محمد القس، وليد فواز، عابد عناني، رحاب الجمل، فرح يوسف، عايدة رياض، محمد محمود عبد العزيز، جيسيكا حسام الدين، نبيل على ماهر وعدد آخر من الفنانين، تأليف نجلاء الحدينى وإخراج شادى عبد السلام وإنتاج الشركة المتحدة وشركة فنون مصر للمنتجين ريمون مقار ومحمد عبد العزيز، والعمل مكون من 30 حلقة.
