بسبب أهل الزوج.. زوجة ترفع دعوى إعلام وراثة بمحكمة الأسرة

"أهل جوزي عاوزين ياكلوا حق بنتي، جوزي مات وأنا عايشة من بعده في خناقات ومشاكل كل يوم"، بتلك الكلمات قررت الزوجة اللجوء إلى محكمة الأسرة لإقامة دعوى إعلام وراثة، بعد وفاة زوجها، حيث وجدت نفسها وحيدة بعد وفاته، لتضطر أن تواجه طمع وجشع أهل زوجها حيث أرادوا السطو على حق ابنتها بعد وفاة زوجها، وحينما وجدت الزوجة نفسها دون مساعد في حياتها، توجهت لمحكمة الأسرة تبحث عن حل لمشاكلها.

الزوجة: أنا وجوزي كنا قرايب واتجوزنا من زمان

وقالت الزوجة في دعوى إعلام الوراثة، التي أقامتها ضد أهل زوجها، أمام محكمة الأسرة، أنها تزوجت منذ مايقرب من 20 عاما، وأنجبت فتاة واحدة من زوجها على فراش الزوجية، "أنا وجوزي كنا قرايب، واتجوزنا من زمان وهو كان كويس جدا، ومفيش منه مشاكل كان راجل زي باقي الرجالة، وكان بيصرف علينا وشايل مسؤولية بيته، ومش مخلينا محتاجين حاجة".

وتابعت الزوجة في دعوى إعلام الوراثة، التي أقامتها ضد أهل زوجها، أمام محكمة الأسرة، "جوزي مات من شهر 7 السنة اللي فاتت، كان تعبان ومات وبعد وفاته كنت لوحدي، ومفيش حد واقف معايا أنا وبنتي، مكنش لينا ورث هو مسالبناش حاجة غير شقتنا، مكنش كاتب أي حاجة لينا، وده اللي طمع الناس فينا بعدين، وملقتش حد جنبي كنت لوحدي".

وأضافت الزوجة في دعوى إعلام الوراثة، التي أقامتها ضد أهل زوجها، أمام محكمة الأسرة، أنها وطفلتها كانا يقيمان بمنزل العائلة مع زوجها، ولم يكن هناك أي خلافات نهائيا، " قبل ما جوزي يموت كانوا كويسين معايا، المشاكل بس كانت زي مشاكل وخلافات بيت العيلة العادية، بعد وفاته بقت كل واحدة في إخواته بتقول أنا ليا حق في الشقة، عشان احنا مخلفين بنت واحدة بس، ودلوقتي عايزين يطردونا من البيت بعد وفاته، من قبل ما جوزي يموت كان نفسي نكتب الشقة باسم بنتي، عشان كنت عارفة إنهم هيعملوا معانا كدة، بس قالوا مينفعش نكتب الشقة باسم البنت في بيت العيلة".

واختتمت الزوجة في دعوى إعلام الوراثة، التي أقامتها ضد أهل زوجها، أمام محكمة الأسرة، أن إخوة زوجها البنات أرادوا السطو على حقها وطفلتها، " معرفتش أعمل معاهم إيه، بس أجرنا الشقة بتاعتنا وسيبناها وقعدنا عند أهلي لحد ما نضمن حقنا، اللي خلانا نيجي المحكمة كان فيه فلوس هو سايبها لبنتي، وجينا نسحبها قالوا لازم نعمل إعلام وراثة وأهله كانوا عايزين ياخدوها".

وأمام تعنت الأهل قررت الزوجة اللجوء إلى محكمة الأسرة، لإقامة دعوى إعلام وراثة.