محمود سعد يكشف تفاصيل الأيام الأخيرة في حياة نبيل الحلفاوي (فيديو)

روى الإعلامي محمود سعد تفاصيل الأيام الأخيرة في حياة الفنان الراحل نبيل الحلفاوي والمرض الذي عانى منه، لافتًا إلى أن أخر لقاء بينهما كان في إبريل خلال وداع الراحل صلاح السعدني.

وقال محمود سعد في مقطع فيديو نشره عبر قناته الرسمية على موقع الفيديوهات الشهير "يوتيوب": "اللي حصل أن زوجتي قالتلي من حوالي 20 يوم أن نبيل الحلفاوي حالته وحشة جدا، هي طبعًا عارفة العلاقة اللي بينا، وكلمته على طول قالي أنا تعبان شوية وكان آخر مرة شفته في أبريل في وداع صلاح السعدني، لقيته خاسس أوي".

وأضاف: "في الأيام الأخيرة في المستشفى كنت بتكلم مع خالد الحلفاوي ابنه، قالي وليد هيكلمك وبعد ما كلمني قالي أنا عايز أقولك على حاجة بابا قالنا كلام مهم عن علاقتكم ببعض وقالنا خلوا بالكم من محمود لما يحصلي حاجة هو اللي هيعملكم كل حاجة لما تحتاجوا حاجة خليكم معاه، لأنه في يوم من الأيام وإحنا راجعين من دفن الكاتب أسامة أنور عكاشة قالي أنا عندي مشكلة أن التربة بتاعتنا في مكان ضيق هنعمل إيه، وقالي إنه عامل خريطة للمدفن للطريق ليه".

وتابع محمود سعد: "وإحنا في الجامع يوم الوفاة ودخلت زوجته نادية بالعكاز، وهو كان خايف عليها وبيقول لها هتسندي على مين، ونبيل له دور كبير جدًا أني موجود في التليفزيون لأن أنا بثق في رأيه وساعدني كتير، ولما روحنا المقابر وكنا بليل كانت ضلمة كحل وتوهنا وبقيت أضرب كف على كف، مع أني كنت كلمت وليد الحلفاوي الساعة 5 وقلت له على الخريطة، لكن توهنا زي ما نبيل الحلفاوي كان قايل".

وأوضح محمود سعد: "مكنش في غيبوبة كان نايم مش عايز ياكل ولا يتكلم، كان أخوه غير الشقيق دكتور مجدي الصيرفي وهو شقيقه من الأم من قريب كدة من حوالي 5 سنوات نبيل قالي أنا كلمت أبويا قولتله نبيل أبوك مات".

وبعد دخوله المستشفى بحوالي 4 أو 5 أيام ولما نسأله نبيل أنت حاسس بينا؟ يرمش بعينه، وبعدها بيومين، توفى بمنتهى الهدوء زي ما كان عايز، وعرفت أنه مريض بالمرض الخطير من الدرجة الرابعة بس مكناش نتصور أنه هيتوفى بهذه السرعة".

وفاة نبيل الحلفاوي عن عمر 77 عاما

سادت حالة من الحزن الشديد على الوسط الفني بعد رحيل الفنان نبيل الحلفاوي يوم الأحد 15 ديسمبر، عن عمر يناهز 77 عاما، بعد تدهور حالته الصحية.