عنايات صالح تكشف سر غيابها: المخرجين بيكرهوا الحجاب

كشفت الفنانة عنايات صالح عن سر غيابها عن الأعمال الفنية، لافتة إلى أنه لا يعرض عليها المشاركة في أي عمل منذ ارتدائها الحجاب.

وقالت عنايات صالح خلال لقائها في برنامج "قعدة ستات" من تقديم مروة صبري: "أنا لبست الحجاب والمخرجين عندنا بيكرهوا الحجاب عندهم مشكلة، كان زمان المخرج يروح المسرح والمعهد يشوف الشباب ويختارهم للأدوار، لكن دلوقتي الموضوع اختلفت النجم هو اللي بيختار".

وأضافت: "أنا محجبة بقالي 3 سنين، كنت بشتغل 3 أو 4 مسلسلات في السنة، وبعد الحجاب قعدت في البيت ولا حد بيتصل بيا، النجوم الجديدة ميعرفوناش، أنا اشتغلت مع كبار المخرجين دلوقتي يقولوا تعالي أعملي اختبار أداء".

وتابعت عنايات صالح: "أروح أعمله مع مخرج مساعد إزاي وأنا اشتغلت مع مخرجين كبار، عديت المرحلة دي من زمان، لكن قلت أجرب رحت لقيت 2 قاعدين صغيرين في السن وكاميرا وخدي المشهد دا قوليه عشان يشوفوا أنفع ولا لأ، أنا زعلت من نفسي أني رحت".

أعمال عنايات صالح

شاركت الفنانة عنايات صالح في العديد من الأعمال الدرامية ومنها، "حكاية ميزو" 1977، "محمد رسول الله" 1984، وفي السينما، "أحلام مشروعة، و"خرج ولم يعد".