تامر حسني: "الرجل القوي باللي بيمسك نفسه عند الغضب مش اللي بيتخانق"

وجه النجم تامر حسني، رسالة هامة لجمهوره عن التسامح، قبل حلول شهر رمضان المبارك، وذلك عبر حسابه الشخصي بموقع التواصل الاجتماعي فيسبوك. 

تامر حسني 

وكتب تامر حسني: “على دخلة شهر رمضان المبارك أحب أبدأ أشارك معاكم بعض المعاني الجميلة اللي بتعلمها في حياتي دي صورة عظيمة جدًا حركت جوايا معنى جميل …. تفتكروا لو اللي شايل كل الناس دي على ضهره لو حد من اللي شايلهم غلط فيه أو ظلمه أو حد سخنه وخلاه يقول كلام مش فيه أو شتمه حتى شتيمه صريحه”.

وأضاف: “لو اللي شايل الناس دي كلها قرر يقوم ويقف ويرد عليه !! هيحصل إيه للناس دي كلها اللي ملهاش ذنب !!؟ أكيد هيقعوا ويتعوروا وهما ملهمش ذنب وخصوصًا إن اللي شايل الناس دي كلها هو شايلهم لإنه بيحبهم كلهم فا أكيد هيلتمس للي بيحبهم مليون عذر وعذر وخصوصًا ان اللي متشالين عشان هما فوق فا مش شايفين معاناة اللي شايل عشان كده ربنا بيدي الشخص المسؤل عن ناس كتير أو موظفين أو عيلة قوة تحمل وصبر وحكمة ورحمة مش عند حد وعشان كده ربنا بيباركله في مشواره اللي ماشيه وهو شايل كل دول من غير ما يشتكي بل بالعكس مستمتع وهما على ضهره”.

واختتم تامر حسني رسالته قائلا: "وصف الرسول عليه الصلاة والسلام الرجل القوي الشديد باللي بيمسك نفسه عند الغضب مش اللي بيتخانق ويضرب يلا نبدأ الشهر بالتسامح والرحمة ورمضان كريم على الجميع".