الورقي
مُجند مصري ظهر في إصدار «ولاية سيناء» يروي حقيقة المواجهة مع التنظيم
تعليقا على الفيديو الأخير الذي نشره تنظيم ما يسمى بـ"ولاية سيناء" التابع لتنظيم داعش الإرهابي، والذي يظهر استهداف عناصره للجنود المصريين باستخدام القناصة، نشر أحد المجندين بالجيش المصري، رسالة روى فيها حقيقية هذا التنظيم وما تم ترويجه عن مهارته العسكرية واحترافية القناصة التابعين له.
وقال إبراهيم فوزي، المجند السابق بالجيش المصري، في رسالة نشرها الصحفي محمد أبو الغيط،:" أنا قضيت فترة تجنيدي في كمين في رفح بين 2015 إلي نص 2016، وبخصوص موضوع القناصين بتوعهم فهما غير ماهرين علي الإطلاق، بالعكس أنا كان يوم آه و يوم لا يتضرب علينا قناصة، وكان نادرًا لما تصيب حد، بدليل إني واخد طلقه قناصة في كوعي وظهرت في الإصدار اللي قبل دا اللي اسمه "لهيب الصحراء"، أنا اللي كنت بغسل وشي عند الخزان الأسود".
وتابع: "وكمان في مرة واحد صاحبي اتضرب عليه 5 طلقات قناصة، وكلهم جم في الطبة بتاعة الدبابة، وفيه واحد تاني كان واقف وخد طلقتين، والاتنين جم في كتفه، وواحد آخر كان واقف خدمة، الرصاصة جاتله في الصاج بتاع الدوشمة اللي واقف فيها، وقصص كتير تدل على إنهم شوية بصمجية مايعرفوش ينشنوا".
واستطرد: "هما بيترعبوا من حاجه اسمها m60 وصوت الطيران، وعلى فكرة هما مش قلبهم ميت ولا حاجة، في منهم اللي أشهد إنه فعلا ولا بيهمه، وفي منهم اللي أول ما تضرب عليه طلقة يطلع يجري".
وأضاف "للأسف إحنا مكانش عندنا أي خلفية عن التعامل مع طلقة القناصة غير لبس الخوذة والفيست؛ لإننا متعلمناش نتعامل معاها إزاي، بس للأمانة فعلا التعامل معاها صعب جدا، خصوصا إنه بيضرب من مسافات بعيدة وبيكون مموه، فبيكون صعب تحديد مكان الطلقه فين، بنسمع صوت الطلقة لكن نحدد مكانها دا شيء مستحيل خصوصا في ظل وجود إمكانيات محدودة".
