«فضيحة» عالمية تحدث بالمجرى الملاحي لـ«قناة السويس»

على نطاق واسع، تداولت صفحات مواقع التواصل الاجتماعي، منشورًا لـ«أمين وهبة»، ضابط بحري شاب، ويصف نفسه بأنه «مؤيد سيساوي عتيد».

وكشف «وهبة» في هذا المنشور واقعة تفضح ممارسات غير قانونية، وتضرب «سمعة الدولة»، وهيئة قناة السويس، «في مقتل»، لاسيما أن تلك الواقعة تتعلق بعمليات فرض ما يشبه «الإتاوات» على السفن المارة بـ«المجرى الملاحي»، وذلك من قبل مرشدين القناة.

وتتمثل هذه «الإتاوات» في الحصول على «مكسرات»، «تين مجفف»، و«سجائر مارلبورو»، والثانية كانت عاملًا مهمًا وسببًا في إطلاق اسم «قناة مارلبورو» على قناة السويس.

وهذه تفاصيل الواقعة كما جاءت في منشور «أمين وهبة»

«كنت معدي من قناة السويس النهاردة والمفروض ان الواحد يكون مبسوط وفخور ببلدي وبقناة السويس وهو معدي اهم ممر ملاحي في العالم مع طقم اجانب ولكن اللي حصل اني بقيت عمال اقول ياريتني ما عديت ولا اعدي من قناة السويس تاني خالص بسبب مرشدين هيئة قناة السويس الى مقدرش اقول عليهم غير حسبي الله و نعم الوكيل من رئيس الهيئة اللي سايب اشكال ضالة في القناة تسئ لكل مصرية ومصري».

وأضاف: «أول مرشد طلع يدخل المركب من منطقة المخطاف الى اول القناة وهي منطقة قصيرة جدا يعني في حدود ساعة فقط ولما دخل المرشد اول ما طلع طلب من القبطان 6 خراطيش سجاير مارلبورو طبعا عشان هو مرشد قناة المارلبورو ده اسم القناة عالميا بسبب شوية رعاع اللي الاستاذ مهاب مميش مسيبهم علينا ومحتلين مناصب وتخصصات مش بتعتهم بس عادي هنعتبرها زي كل حاجة في البلد المهم المرشد خد اللي هو عايزة ودي مش المشكلة انما المشكلة بقي لما اول مرشد سلمنا للسفاح مرشد القناة "سيادة اللواء" اللي عمري ما شوفت في حياتي نقص ولا بجاحه ولا سفالة ولا حقارة ولا كل الصفات القذرة متجمعة في شخص»

واستكمل: «أول ما طلع سيادة اللواء المرشد بدأ بالأسلوب الرخيص وهو بيتلكك للمركب على حاجات اصلا مش موجودة ولما لاقي المركب كولوا تمام الحمد لله بدأ يقول للكابتن انا عايز 17 خرطوشة سجاير مارلبورو عشان ميعملش مشاكل للمركب ويدفعها غرامة ويعطلها يعني من الاخر اتاوة المهم اتفقوا على 15 خرطوشة ودي برضوا مش مشكلة دا الطبيعي بتاعهم انما بعد شوية سيادة اللواء المرشد طلب ياميش رمضان وزعل قوي لما الكابتن قالو لسة مجبتش فقالو ازاي معندكش وانت عندك ضباط مصريين لا انت عندك وانا عايز ياميش رمضان علشان ياخدو البيت».

وقال أيضًا: «بعد كدا ادي الكابتن عينة فسدق وعينة حبهان والله العظيم جايب معاة حباية وحباية واداهم للكابتن وقالو انا عايز من دة للبيت

بعد شوية طلب تين مجفف و طلب اللنش بتاع هيئة قناة السويس علشان يجي ياخد الغنيمة بتاعتو اللي اتحصل عليهم ووصل اللنش اللى طالع يلم الغنايم وبعد كدا هيوديها للمرشد لحد البيت واتفقو انو هيحاسب اللي هيوصل الغنائم لحد البيت ولما وصل اللنش فا السجاير محطوطة فى كيس قمامة كبير يقوم سيادة اللواء المرشد يعمل اية فتح التلاجة الى في غرفة القيادة ومفضي اللي فيها في الكيس اللي في الغنائم والله العظيم انا بقيت واقف عمال اقول يا ارض انشقي وابلعيني لما ابقي واقف المصري الى في وسط زمايلي الى معايا اللي من سبع جنسيات مختلفة والحقير سيادة اللواء المرشد الجعان الى عمرة مشاف خير يعمل كدا وعلى فكرة لو حد عارضو هو عندو صلاحية يوقف المركب ويحجز عليها ويدفعها غرامة لا تقل عن 20 الف دولار لي اي سبب هو يقولو الهيئة الفاسدة بتاعتو هتصدقو».

وتابع: «المهم قبل ما ينزل السجاير فا بيقول للقبطان اية رأيك أبيعلك السجاير المفروض السجاير دي اللى هو شاحتها من على المركب اللى واخدها اتاوة عايز يبيعها للكابتن تاني وياخد فلوس المهم الكابتن وصل لمرحلة لا تسر تماما..  المهم نزلت السجاير بس السفاح لسة موجود..  شوية وطلع كيس من الشنطة بتاعتو وعايز شوية فاكهة للبيت..  وشوية وجالو العشا فا كان العشاء فيه رز بالخلطة والخلطة فيها مكسرات وشاف المكسرات وبدأ يتعصب بقي عشان الكابتن قالو اننا معندناش مكسرات والرز طلع فيه مكسرات المهم شوية وطلب حاجة ساقعة ياخدها معاة البيت والاغرب بقي كمان عايز ماية معدنية للبيت والله العظيم عمري ما شوفت فى حياتي احقر من الشخص دة فى حياتي واللى بعد ما عمل كل دة قام بيصلي ودى كانت الكارثة بالنسبالى علشان خلي الناس كلهم يقولو همي دول المسلمين.. لعنة الله عليك يا سيادة اللواء المرشد»

وختم: «علشان حضرتكو تعرفو حاجة المركب دافعة رسوم عبور القناة حوالي 350 الف دولار غير شوية مصاريف تدخل فى 20 الف دولار يعني هيئة غنية بس جايبة شوية سفاحين مسيباهم يفضحو مصر اكتر ما هي مفضوحة..  اسف على الاطالة بس حبيت انقل صورة من صور الفساد اللى فى البلد

#أمين_وهب .. ظابط بحري شاب ، ومؤيد سيساوي عتيد !