نائب مدير مستشفى النجيلة يكشف حقيقة التحقيق مع بعد إعلان إصابته بكورونا

علق الدكتور محمد علام، نائب مدير مستشفى النجيلة، على ما تم تدواله خلال الساعات الماضية بشأن تحويله إلى التحقيق، بعد إعلان إصابته بفيروس كوورنا المستجد.

وقال «علام»، عبر حسابه الشخصي على موقع التواصل الاجتماعي «فيس بوك»: «معلش أنا لازم أرد على الحته دي وياريت أي حد يشوف تعليق أو كلام لأي حد فيها يحط لينك ردي علشان مش طالبة استغلال لحاجة عادية وبتحصل في كل العالم، وأنا عارف إني معرض لكده من أول يوم، أنا محدش طلب مني إني معلنش إنى مصاب أنا اللي طلبت من أول لحظة وأعلنت لما عديت المرحله الصعبه وبقيت كويس ومحدش عاتبني أو قالى ليه أعلنت، ده حقي ومحدش نهائي اتكلم معايا فيه أو جادلني فيه، وليهم كل الشكر والتقدير في دعمي في القرارات دي».

أضاف نائب مدير مستشفى النجيلة: «أنا مطلبتش اثبات إنى مصاب واتمنع مني معرفش الناس جابت الكلام ده منين، أنا متحولتش للتحقيق ومش فاهم بردوا الناس جابت الكلام ده منين، وياريت أي كلمه مطلعتش على لساني متصدقوهاش ومحدش يستغل الخبر علشان ده مش وقته ولا وقت اختلافات خالص كلنا في مركب واحد فبلاش نزايد على بعض وبلاش نطلع اشاعات».

وتابع علام: «زي ما الناس احترمت إني مريض وليا كامل الحريه في الإعلان أو إني أخبي، أنا بحترم حريه كل شخص مصاب وده حقه محدش يقدر يقول أنا فلان مصاب أو لا غير بمزاجه هو وليه كامل الحرية، وشكرا لكل الناس اللي كتبت كلام حلو والله انا متفاجئ من رد الفعل ده واثر فيا جدا لدرجه البكاء ربنا يكرمكم».

واختتم علام: «بس كلمة بطل كبيرة شويه ومستحقهاش.. البطل هو اللى ضحى بحياته غيري الموضوع وصل معاه للموت، فأنا مهما مريت بتعب أنا بقيت كويس متقارنش بيه.. البطل هو كل دكتور وممرض وفني في مصر اتصاب في شغله ونقل العدوى لأهله وحد منهم وقع قدامه واستحمل ومنهارش.. البطل من قبل الكورونا بس الناس مكنتش واخدة بالها هما كل مقدمي الخدمه الصحيه في مصر.. لو الكورونا خطير ففي أمراض مميته بيتعاملوا معاها كل يوم والإصابة يعني حياتك وقفت وانتهت.. دمتم بأمان والله هتعدي بس التزموا بالحظر والتعليمات وبلاش استهتار».