كلمات مؤثرة تكشف دور الجندي المعلوم في سيمفونية أمم ٢٠١٩

وسط احتفال الجميع بمرور عام على النجاح المبهر الذي قدمته سواعد أبناء مصر في تنظيم كأس الأمم الإفريقية، لم ينس الزميل عاطف شادي، أحد الكوادر التي ساهمت في عزف سيمفونية النجاح، أن يقدم الشكر للجندي المعلوم في احداث أوركسترا التناغم بين جموع الإعلاميين، سواء المصريين أو الأجانب، بصورة أدت لانطباعات رائعة، وذللت كل العقبات، وساهمت في اكتمال مشهد النجاح على المستويين التنظيمي والإعلاني

وتابع: "فيه واحد بجد اشتغل من كل قلبه من أول يوم سواء في السنغال لما تم التصويت لمصر تاخد البطولة مع وفد مصر المحترم اللي كان برئاسة المهندس هاني أبو ريدة، وكمان لما رجعنا وبدأ التحضير للقرعة كان موجود ونظم الدنيا بجدارة"

وواصل: "وقبل بداية البطولة بشهور تم اختياره في اللجنة المنظمة للبطولة كمدير للإعلام، وشارك في كل التفاصيل ودار في الملاعب الستة بكل المحافظات وملاعب التدريب، ومع بداية البطولة تم اختياره من الاتحاد الأفريقي على رأس مجموعة السلام الإعلامية، والكل كان بيستنى اليوم اللي فيه مباريات هناك علشان يشوفه ويتعامل معاه وكان بيوفر كل شيء في ثانية واحدة، وكان بيخلص شغله في السلام مع الكاف ويسافر يطمن على المجموعات التانية في السويس والإسماعيلية والإسكندرية والقاهرة، وكمان قام بتدريب كل الناس اللي اشتغلت في البطولة في النواحي الإعلامية"

وأضاف: "فاكر يا صديقي قبل البطولة بيومين ثلاثة لما سهرنا في الاستاد نجهز المركز الإعلامي الرئيسي ومكاتب الأكردتيشن وتنظيم بوابات الدخول والخروج وكنا بنساعد عمال استاد القاهرة إننا نطلع الكراسي والترابيزات تتحط في مكانها ونساعد مع الرجالة في وضع ملصقات البطولة وده عن حب منك وبدون ما تاخد منه أي مقابل؟"

واختتم عاطف شادي: مصطفى طنطاوي حكاية كبيرة قوي في بطولة كأس أفريقيا ٢٠١٩ 

❤️😍❤️