الورقي
أحمد فلوكس يفضح أشرف زكي: «عملت حلقة وقبضت تمنها».. وهكذا هدد بسمة وهبة وزوجها
أثار الفنان أحمد فلوكس، خلال الساعات الماضية، حالة كبيرة من الجدل على مواقع التواصل الاجتماعي، عقب تداول مقاطع فيديو له، ظهر فيها وهو يهاجم نقيب الممثلين الفنان أشرف زكي،
وقال «أحمد»، في الفيديو الأول: «أنا عايزكم تتفرجوا وتشوفوا كل واحد فيهم بيعمل اية.. عشان لما تشوفوا ربنا هيعمل اية في الآخر يبقى رسالة وعبرة لينا كلنا.. يعني حتى لو أنا أخطأت أنا راضي بأي حاجة ربنا هيعملها فيا.. على الأقل أكون خلصت أي ذنب من ذنوبي.. دة لو أنا غلط في أي حاجة بس».
وتابع: «الدكتور أشرف زكي دكتوري وأستاذي ونقيب الممثلين.. كلمني إمبارح وبيقولي ما تيجي يا أحمد نبدأ بداية جديدة.. قولتله بداية جديدة إزاي مش فاهم.. قالي نعمل فيديو لزملايلنا ونقول إن الصلح خير.. حسيت إن إحنا كان من بينا طلقة أولى والأهل بيرجعونا.. ما علينا.. قولتله أنا معنديش مشاكل مع حد.. أنا مشاكلي مع ناس بتطلع تتكلم وتخلي شكلنا ميصحش».
وأضاف: «يا أستاذ ميصحش إن إحنا نعمل أعمال فنية تظهر تعلم جيل حاجات إحنا أساسًا بنتحارب عشان منعملهاش في حياتنا.. فـ إزاي نعلمهلهم على الملأ!.. أنت عارف أنا بحبك ولا لأ.. طبعًا هو بيكلمني لأنه قبلها بيومين راح قبض وعمل حلقة مع الأستاذة معدمكش… وقفش تمن الحلقة.. وبيحكيلي إنه قال إنه هياخدني في حضنه».
وأوضح: «تاخدني في حضنك ليه هي مراتك فين ما تاخدها في حضنك أنت مالك ومالي.. وبعدين بتقوله أنا رافعة عليا قضية.. قضية اية؟! أنتي بعد ده كله عايزة ترفعي عليا قضايا.. إن لم تستحي فأفعل ما شئت.. نرجع للدكتور أشرف زكي.. طيب يا دكتور حضرتك كنت فين.. لو كنت بتحبني.. وأنا الأستاذ المعد اللي جابك وجاب الناس تغلط فيا.. اللي هي جيباه جاب أبويا وشربوه حاجة وخلوه طاله بالمنظر ده وقال كلام.. وخلتونا كلنا في حوارات.. جبت حق أبويا؟!».
واستطرد «فلوكس» حديثه: «حضرتك كنت فين وأنا مرفوع عليا قواضي.. وهما قالولك إحنا عارفين عنه كل حاجة.. عملتلي اية؟.. أنت مضتني شيكات بفلوس لمنتج وفلوس زيادة عشان تشتري المنتج وتكسب وده.. وقولتلي أنت خسرته.. أنا مبخسرش الناس ياريس.. لأني مبشوفش الناس زكايب.. حضرتك فين والبرامج عمالة تقطع فينا واحد ورا التاني ومخليانا كلنا نضرب في بعض.. أنت فين كنقيب.. ولا في الآخر بتقعد زي الزبون وتقبض تمن الحلقة وتقعد تقولهم هاخدهم في حضني».
وأردف: «أنا مش عايز حضنك ياريس.. أنا عايز حقي.. عايز حق أبويا.. عايز حق الناس.. وبعدين قضية اية اللي رفعاها.. طبعًا عشان جوزك علاء عابد.. سيادة النائب بتاع مستقبل وطن.. أنا أعرف كل حاجة عنكوا.. أعرف أشرف زكي من وهو في المعهد بحواراته وبسلطاته.. وحضرتك أعرف كل حاجة عن جوزك من أيام ما كان ضابط بواقعة أحمد سعد بشقة حدائق الأهرام.. بفلوسه منين.. أعرف كل حاجة ولو اتكلمت دي فيها اعتقالات ومال شعب».
وأنهى كلامه: «الرد لأشرف زكي أنا هبعتلك ورق رسمي لو متحركتش يبقى أنت مش نقيب لكل الفنانين.. ولا أنت نقيب بس للي ميعرفوش ربنا.. واللي يعرفوا ربنا مش بتهتم بيهم.. أستاذ علاء عابد حضرتك ماسك لجنة المواصلات في حزب مستقبل وطن.. حضرتك كعضو مجلش شعب تقبل نوعية البرامج اللي مراتك بتقدمها على القنوات.. هل حضرتك يا عضو مجلس الشعب.. عايز تعمل فتنة للشعب.. أنا عايز ردك.. إزاي مراتك تهين واحد كل يوم وبعدين ترفع عليه قضية عشان محامي.. أنا عايز أعرف أنت فلوسك منين وإزاي بقيت غني كدة وأنت كنت ضابط كحيان.. أنا عايز رد على الكلام دة».
وقال أحمد فلوكس، في مقطع فيديو آخر، بعد تلقيه اتصالًا من أشرف زكي: «أشرف زكي بيكلمني دلوقتي بيقولي أنت بتقول إن أنا مرتشي.. أنا مقولتش إنك مرتشي عشان عارف أنت عايز تعمل اية.. وهتطلع تعمل النمرتين بتوعك والتحقيق والنقابة.. أنا قولت إن أنت روحت حلقة وقبضت تمن مرواحك عشان تقول الكلمتين دول ولا أنت روحت لله.. من الآخر فكك من الحوارات عشان مش هتاكل معايا.. عزعلك وهعريك وهفضحك أدام الناس».
وختم كلامه: «اتقي الله.. اتحرك كنقيب بدل ما أنت عامل فيها مطبلاتي وبتاع السبع ورقات.. اتحرك وهات حق الناس وحقي.. أنت سامع ولا مش سامع يا أشرف يا زكي».
أزمة أحمد فلوكس وبسمة وهبة:
وتعود أزمة الفنان أحمد فلوكس والإعلامية بسمة وهبة، إلى استضافة الأخيرة الفنان مصطفى درويش في برنامجها «العرافة»، وتحدثت معه عن مشكلة أحمد فلوكس مع إلهام شاهين.
وعلق أحمد فلوكس على اللقاء، ساخرًا: «نحن نظلم الإعلام.. فا ها هو الإعلام ينشر احترام الكبير واحترام القامات ويفعل ما يقول.. يا رب سامحني على ظلمي لكائناتك التي خلقتها».
