قانون الأسرة ينصف خالد عليش بحكم تاريخي

علق الفنان خالد عليش على حكم محكمة الأسرة بالسماح له برؤية من ابنته من زوجته السابقة ميما الشامي، لمدة 11 ساعة أسبوعيا.

قال خالد عليش عبر حسابه الشخصي على موقع التواصل الاجتماعي "فيسبوك": "النهاردة أنا خدت حكم تاريخي يارب يتنفذ علي خير، وتاريخي لأنه أحسن حكم ممكن أخده في ظل ظروف قانون الأسرة السيئ لحين تعديله.. واللي طلع الحكم قاضي مش واحد صاحبنا فا ده معناه أن الراجل قرأ وفهم وبيدي لكل واحد حقه".

وأضاف الفنان خالد عليش: "لكن جه الوقت اللي اقول فيه اللي جوايا، حسبي الله ونعم الوكيل أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر أني ما اشوفش بنتي بطريقة إنسانية، كل حد كبير أو صغير جريت وراه بالمكالمات عشان أشوف أي حلول ودية، حتى الحركات والجروبات النسوية اللي بيدافعوا عن الست وخلاص، أي حد بيكتب تعليق وهو مش فاهم حاجة".

خالد عليش يحصل على رؤية ابنته 11 ساعة في الأسبوع

وتابع "عليش": "فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم، وأنا ملتزم بكافة الالتزامات المادية ناحيتها من أول يوم كاملة وزيادة كمان عن المستوي المادي والاجتماعي اللي عايشين فيه ومع ذلك استحملت كتير وماردتش، أنا لا حول لي ولا قوة حاولت مع كل الحلول الرسمية والغير الرسمية، تعبت من اللف في دوائر مغلقة، تعبت من نظرة والدي ووالدتي المريضة اللي نفسهم يشوفوا حفيدتهم ومش قادر اعملهم ده".

واستكمل: "أنا اوحش رجل في العالم ولكن ما استحقش أني ما يكونش عندي فرصة اتكلم واخرج معاها وافسحها عشان علاقتي بيها تبقي كويسة، ومحدش يقولي أنت السبب عشان سيبت ماماتها أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية وكل شئ نصيب والانفصال كان برغبتها قبل رغبتي".

وأوضح خالد عليش: "محدش يقولي ما أنت كنت زوج وحش و.. و.. أنا يمكن مكنتش أحسن زوج برغم أني عملت اللي عليا كتير واجتهدت كتير عشان اسعد الطرف التاني ولكن ده مش معناه أني إنسان وحش ومستحقش فرصة تانية ومستحقش أشوف بنتي، محدش يقولي ما أنت مبسوط واتجوزت تاني، أنا فعلا الحمدلله زي الفل ومبسوط أني أخدت فرصة تانية ربنا يكرمني فيها وأكون إنسان أفضل واستمتعت ب حق  ربنا سبحانه وتعالي والمجتمع اداهوني اني أتجوز تاني بعد انفصالي رسميا بأكتر من سنة بس مش معنى كده أني ارمي طفلي مع أمه ومطلوب مني انساه، محدش يقولي ما انتا كنت بتشوفها".

وكشف قائلًا: "أنا فعلا مع بداية الانفصال كنت بشوفها ساعات قليلة في الأسبوع  بس مع أي تصرف ما يعجبش ماماتها تقولي أصل البنت مش فاضية عندها عيد ميلاد عندها تمرين ووسط شروط كتير منها متتصورش معاها وتنزل ليها صور - متوديهاش عند اهلك - تيجي عيد الميلاد لوحدك دون باباك أو ماماتك، حسيت في الوقت ده اني لازم استخدم التعاقد اللي بيني وبينها اللي بيقول أني أخد البنت يوم في الأسبوع ولكن القانون أداني حق الرؤية الطبيعي الغير إنساني لطفل فضلت 5 شهور في مساومات أني معملش تنفيذ لحكم الرؤية حفاظا علي البنت ولكن ماماتها صممت وبعد التنفيذ كان مهانة ومذلة للطفلة وليا بعدها مبقتش اروح وبعت انذار رسمي ليها بكده ومازلت في الإجراءات القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي ومناسب".

وشدد: "محدش يقولي ما أنت ما بتصرفش عليها ومبهدل ماماتها في المحاكم برغم أن مش ده الموضوع بس الحمدلله الفلوس اللي الأم طلبتها كنفقة ومصاريف بتوصل كل أول شهر دون أي محاكم من أول يوم حصل بينا انفصال رسمي دون محكمة بعقد اتفاق بينا ولو حصل دخول محاكم في أول الخلاف ف الأم اللي بدأته وده بالتواريخ مش بالكلام موضوع أن في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير ومع ذلك قولت أنا عندي استعداد لأي زيادة غير منطقية بس نقعد ونتناقش".

واختتم خالد عليش: "محدش يقولي روح شوفها عند جدتها عشان أنا مش هعرف يبقي في علاقة طيبة بيني وبين بنتي وأنا قاعد معاها ساعة عند جدتها وهما قاعدين جنبي وقعدتي تبقى كلها مذلة ومهانة، محدش يقولي أنت بتتظاهر انك عايز تشوف بنتك لكن أنت مش فارق معاك الآبهات هنا اللي هيحسوا قد إيه دي حاجة مؤلمة وأنا مش محتاج اعمل ده وطول الوقت طلبت من أي حد قريب منهم أن إحنا ننزل ونقعد ونوصل لحل وسط أنا مش طالب فيه غير أني أخد بنتي يوم في الأسبوع أخرجها وأرجعها، أنا نفسي أحس بحضن بنتي بقالي اكتر من سنة ومقعدش أتكلم في مشاكل حصلت من سنين، أنا أوحش رجل في العالم بس حقي أخد فرصة عشان تكون في علاقة كويسة بيني وبين بنتي حسبي الله ونعم الوكيل، شكرا للأستاذ شعبان سعيد المحامي وربنا يكملها بخير، شكرا ميريهان زوجتي انك مستحملة كل ده وفي ضهري ومؤمنة بيا".