الورقي
الغندور يكشف حكاية عودة جنش وصبحي للزمالك وتوقيع محمد بسام
الغندور يكشف مصير جنش وصبحي
أكد الإعلامى خالد الغندور أن محمد بسام حارس مرمى الطلائع وقع للزمالك وحصل على شيك وصرفه وقبلها وقع للبنك الأهلى وحصل على شيك ولم يصرفه، مشيرًا إلى أن محمد أبو جبل دخل في خلاف مع مسئولي النصر السعودى بعد توقيعه.
وقال خالد الغندور في برنامجه اللعبة الحلوة عبر إذاعة أون سبورت إف إم: "مسئولو الزمالك قعدوا مع محمد أبو جبل ومن الآخر مفيش جديد حصل في الجلسة، وأبو جبل بعد ما رجع من كأس أمم وقع للنصر السعودى وحصل على قيمة أول موسم كاش، النصر رجع في كلامه وقالوله هنسبلك قيمة أول موسم ولكن الحارس متمسك بقيمة العقد كاملًا".
وتابع الغندور: "أبو جبل قصته مع الزمالك انتهت خلاص، ونرجع نقول إن الحارس تفكيره وداه في حتة تانية بقى مش مركز من وقت ما رجع من كأس الأمم الأفريقية واهتم بالبرامج ومركزش في الأهداف اللى بتدخل مرماه".
جنش مش راجع
وتابع الغندور: "جنش مش راجع الزمالك وفيوتشر هيفعل بند البيع، وفاركو هيدفع الـ 20 مليون جنيه ويفعل بند شراء محمد صبحى يعنى الإثنين مش راجعين الزمالك".
وأكمل الغندور: "محمد بسام هو الحل الوحيد دلوقتى والحقيقة هو وقع للبنك الأهلى وحصل على شيك لم يصرفه ثم وقع للزمالك وحصل على شيك وصرفه".
وانتقد الغندور قرارات اتحاد الكرة بعد مباراة الأهلى وسموحة، والتى شهدت إيقاف سيد عبد الحفيظ مدير الكرة بالنادى الأهلى مباراة واحدة. وقال خالد الغندور فى برنامجه اللعبة الحلوة عبر إذاعة أون سبورت إف إم، "لازم عشان ننجح النظام يطبق على الكل سواء أهلى أو زمالك أو محلة أى فريق".
وأضاف بندق، "من أمن العقاب أساء الأدب، إزاى سيد عبد الحفيظ يتوقف مباراة واحدة بعد طرده أمام سموحة، رغم أنها مش المرة الأولى التي يخرج فيها عن النص وتم طرده أربع مرات قبل ذلك، ما يعنى أن العقوبة غير رادعة، فلازم يتم مضاعفاتها، وإزاى على لطفى لم يتم عقابه بعدما زعق للحكم الرابع وقاله متتكلمش معايا بالأسلوب دا".
وتابع نجم الزمالك السابق، "عندنا أخطاء والحكام ميحبوش بعض وبيجننونا فى التحليل بس لازم احترامهم ومينفعش لاعب يزعق للحكم كده، لو مكنش على لطفى في الأهلى مكنش يقدر يعمل كده مع الحكم، حسام حسن اتوقف 6 شهور وشيكابالا 8 مباريات ومحدش أتكلم، ازاى بقى محدش قال حاجة لعلى لطفى".
وأضاف، "أنا مش بقول كده عشان زملكاوى بس ميصحش ياجماعة اللى بيحصل لازم نصحح من أخطائنا، حكام مصر بتخاف من لاعبى الأهلى والزمالك، وبتطلع إنذارات بسهولة للاعبى الفرق الأخرى".
وأكمل، "الأهلى حط محمد عادل فى البلاك ليست عشان قال الاحتواء رغم أنه عمل مباراة كبيرة والأهلى فاز بخمسة على الزمالك، والحكم بقاله 6 شهور محكمش للأهلى مباراة".
وأوضح، "الأندية أقوى من الحكام والحكام بيعملوا حساب لجلسات تقطعيهم على الهواء بعد مباريات الأهلى والزمالك".
