نصائح ياسمين عز للسيدات للحفاظ على نفسية الأزواج خلال فترة المونديال

قدمت الإعلامية ياسمين عز عدة نصائح للمتزوجات قبل بداية بطولة كأس العالم في قطر ٢٠٢٢، مشيرة إلى أهمية الحفاظ على الحالة النفسية للزوج أو الخطيب خلال فترة المونديال والمقرر انطلاقه غدا، الأحد. 

نصائح ياسمين عز للحفاظ على نفسية الزوج والخطيب خلال بطولة كأس العالم

وقالت ياسمين عز، خلال تقديم برنامج “كلام الناس” المذاع على قناة “إم بي سي مصر”، إن كرة القدم ستكون ضرة الزوجة أو الخطيبة خلال شهر كأس العالم، مضيفة: "الست الواعية هي اللي تعرف تتعامل مع ضرتها وتخرج من الشهر ده بأقل الخسائر وأكثر المكاسب".

وقدمت ياسمين عز للزوجات عددا من النصائح المفيدة، خلال كأس العالم، وهي:

- تخيلي إنك مسافرة ومشوفتيش أمك من 4 سنين، لهفتك على أمك هي نفس لهفة جوزك وهو منتظر ماتشات كأس العالم.

- متحاوليش تقللي من شغفه، وكل شوية تقولي مالك ملهوف على الماتشات وسايبني، لأن وقتها هتسمعي رد مش هيعجبك.

- حالة النظافة المفاجئة وتلميع الشاشة وتنظيف النجف وتشغيل المكنسة ملهاش لازمة وقت الماتشات.

- مع بداية الماتشات كل يوم الساعة 12 الظهر، جوزك يلاقي الفشار والحاجة الساقعة والريموت وكل حاجة متظبطة، أثر ده على نفسيته هينعكس عليكي بعد كده.

- من فوائد شهر كأس العالم إنه بيعرفك قيمة جوزك، وإنت واقفة عند الكاشير في السوبر ماركت متنسيش تدعي لجوزك اللي سايبلك الفيزا، وعمره ما حسسك بغلاء الأسعار.

- طول شهر كأس العالم بلاش الأسئلة اللي بتجيب تصلب شرايين للرجالة، وخاصة أعملك إيه على الغدا.

- حتى لو مش بتحبي الكورة، حسسيه إنك بتشاركيه اهتماماته، أسأليه بتشجع منتخب إيه، وإتفرجي معاه وشجعي من غير مبالغة.

- المخرجين في كأس العالم بيركزوا على البنات الحلوة في المدرجات، لو جوزك بص للشاشة وابتسم ده معناه إنه مبسوط بالحدث ككل، مش إنه معجب بالست اللي في المدرج.

- لولقيتي جوزك بيناديكي بـ “ليفا أو يا ليو” ده كده بيدلعك مش بيخونك لأن دي أسامي لاعيبة افهمي الموضوع.

- لو قلت لجوزك اقفل عينك لم الكاميرا تيجي على بنت حلوة هيقفل منك.

- الراجل قلبه واجعه على غياب منتخبنا عن كأس العالم، متبقيش إنت والزمن ومنتخب السنغال عليه.

-آخر خمس دقائق في الماتش فرصتك اطلبي منه اللي أنت عوزاه لوطلبتي منه عنيه هيدهالك.

-لو جوزك زملكاوي وبيتفرج على ماتش لتونس وقالك يا “جزيري” أو أهلاوي وقالك يا “عللو” عديها متقفيش عالواحدة.