الورقي
ابنة سيد مكاوي لمنتقدي «سيدتي الجميلة»: «اتحمقوا على المسرحيات اللي بتتقدم للمواطن بتاعنا الأول»
وجهت «أميرة»، ابنة الفنان الراحل سيد مكاوي، رسالة إلى منتقدي إعادة تقديم مسرحية «سيدتي الجميلة»، وذلك عبر حسابها على موقع التواصل الاجتماعي «فيس بوك».
وكتبت: «مسرحية هتتعرض لمدة كام يوم في دولة تانية، مش محتاجة كل الكم ده من الإزاي.. أولًا حضرتك مش هتتفرج عليها من أصله.. ثانيًا عيب لما تكون بتدافع عن نجوم كبار فتقوم حضرتك بنفسك تحطهم في مقارنة مع جيل تاني في كل الأحوال مهما كانوا مش هيبقوا زيهم، مش بس علشان الموهبة لكن لأن مفيش حد زي حد من الأساس».
وتابعت: «ثالثًا هو ايه اللي يمنع نعيد تقديم الأعمال الكبيرة بروح تانية وجيل تاني؟ ويعرفوها جيل أكاد أجزم إنه ميعرفش المسرحية من أصله بتاعة أستاذ فؤاد ومدام شويكار؟.. رابعًا هي دي أول مرة تتقدم مسرحية سيدتي الجميلة بعدهم بتنويعات مختلفة؟ هو حضرات المدافعين مشافوش مسرحية دنيا سمير غانم أنستونا؟».
وأضافت: «الأهم بقى إنكم بتتخانقوا كالعادة مش في قلب الخرشوفة.. اتحمقوا نفس الحمقة أرجوكم على عدد المسارح في مصر، وحالة مسارح الدولة، وعدد المسرحيات اللي بتتقدم للمواطن ( بتاعنا) الأول.. وكفاية دوشة على كل حاجة».
وأثارت فكرة إعادة مسرحية «سيدتي الجميلة» حالة واسعة من الجدل على الساحة الفنية، خلال الساعات الماضية، وتعرض أبطالها لهجوم شديد، ووضعهم الكثيرون في مقارنة مع أصحاب المسرحية الأصلية النجمين فؤاد المهندس وشويكار، والتي جاءت لصالح الراحلين.
وهي بطولة: أحمد السقا، وريم مصطفى، ومحسن منصور، وعلاء مرسي، وليلى عز العرب، وهي سيناريو أيمن بهجت قمر، وإخراج مصطفى حسني.
وتعد المسرحية الأصلية «سيدتي الجميلة» واحدة من أيقونات الأعمال المسرحية الكلاسيكية، التي عرضت عام 1969.
