رفض أولياء أمور الطلاب المصريين فى الخارج ضم الترمين الدراسيين

رفض أولياء أمور أبناؤنا فى الخارج ما يتم تداوله من أنباء عن إلغاء امتحانات الفصل الدراسى الأول، بعد الوقوع المتكرر للمنصة الإلكترونية للامتحانات لليوم الثانى على التوالى  وهو ما أثار موجة من الغضب والاستياء من قبل أولياء الأمور بالخارج.

فى البداية يقول خالد عبد الفتاح ولى أمر من أبناؤنا فى الخارج، إن أولياء الأمور طالبوا من الوزارة فى البداية قبل بدء الامتحانات بإتاحة المنصة على مدار اليوم مع إلتزام كل طالب بميعاد امتحانه، وارجع السقوط المتكرر للمنصة للإستحداثات التى قامت بها الوزارة وإدخالها على المنصة  ومنها   أوبشن جديد منها  فتح الكاميرا لرؤية الشاشة والطالب وهو ما تسبب فى وقوع المنصة بالكامل، بالإضافة إلى نظام البروكسى وهو فتح الامتحان وفقا لتوقيت دولة المقيم وهو ما تسبب فى عدم فتح المنصة بالكامل فلجأ بعض الطلاب وأولياء الأمور إلى التحايل واستخدام برنامج الـvpn لتغير دولته ولكن المنظومة فشلت وقامت الوزارة بإلغاء امتحان الأمس، وفى محاولة من الوزارة لحل مشاكل أمس أعلنت الدخول  للامتحان من خلال 3 روابط جديدة لم تعمل أيضًا، بالإضافة إلى الرجوع إلى البابل شيت ورقيا، بحيث يتم رفع الامتحان على المنصة وتحميله، ولكن هذه الطريقة بأت بالفشل أيضا ولم يستطع أحد دخول الرابط لفشل المنصة الإلكترونية فى التحميل ووقعها لليوم الثانى على التوالى، مضيفا أنه على الرغم من لجوء بعض أولياء الأمور الدخول على المنصة بشتى الطرق والتحايل إلا أنهم فشلوا.

وأكد عبد الفتاح على، أن نظام vpn محظور استخدامه فى بعض الدول، طالبًا ضرورة رجوع الامتحانات كالأعوام السابقة النظام الورقى حيث يقوم الطالب بالامتحان ورقيا وإرسالها إلى مقر إدارة الامتحانات بالقاهرة لتصحيحها، كما أعلنت الصفحة الرسمية للامتحانات بوزارة التربية والتعليم، على الرغم من الأعباء التى ستزيد على كاهل أولياء الأمور ومعانتهم  ويحمل فى طياته  المزيد من الخطر والأخطاء هو طبع الامتحانات إرسال بالبريد وبخطابات مسجلة من كل دول العام لإدارة الامتحانات فى مقرها بالقاهرة  لتصحيحهاعن طريق البريد، وتقوم الإدارة بدورها بتجميع الامتحانات وفرزها وتصحيحها وإعلان النتائج.

وأكد "عبد الفتاح "على رفضه التام لفكرة تأجيل الترم الأول أو ضمه مع الترم الثانى.

تحذير من استخدام برنامج VPN

ونوه عمر محمود، إلى خطورة لجوء بعض أولياء الأمور لاستخدام  VPN لتغير توقيت، معقبًا: “الناس متوقعة أن ده صح ولكن ده غلط لأن احنا امتحنا مثلًا في الكويت امبارح ولما نيجى نفعل VPN على دولة كذا هيعاملنا أن احنا من الدولة كذا، لأن أصلا المشكلة مش فى الدولة اللى احنا فيها المشكلة فى مصر فملهاش علاقة”.

وأكد على ضرورة اتباع الطرق المعلنة السليمة من قبل المنصة الإلكترونية والوزارة،مشيرا إلى أن  متصفح BRAVE غير مصرح به من قبل الوزارة ولا يوجد قرار رسمى ينص على استخدام أى متصفح آخر بخلاف متصفح GOOGLE CHROME، بالإضافة إلى دخول وخروج الطلاب  موقع الامتحانات يكون فى المضمون، فا ياريت يا جماعة نشوف الطريق المضمون ونركز عليه.

رفض أولياء الأمور ضم الترمين

وطالبت مها أبو السعود، بعدم إلغاء الترمين لا ترحيل أو تأجيل امتحانات الفصل الدراسى الأول وفكرة ضمه مع الترم التانى، متابعة: “ولادنا ملهمش ذنب أننا نذاكر الترمين مع بعض دى مشكلة الوزارة والمنصة، خاصة أننا التزمنا بالتعليمات اللى طلبتوها قولتوا أدفعو بالدولار قلنا حاضر ابعتو ورق بريد لمصر 200 ريال حاضر، مفيش مدارس ليكو قلنا حاضر”.

وتابعت: “الصورة الخاصة بالطالب مش واضحة صورناهم تانى حاضر، الورق ناقص كملوه حاضر، فعلو الإيميل حاضر، غيرو الباسورد حاضر، لا الباسورد وحش ارجعوا للقديم، الامتحان إلكترونى، الامتحان ساعة واحد وهيقفل حاضر، كل واحد لاب توب، ادخلوا حلو امتحان تجريبى، ألبسي يا بنتى نفس التيشرت عشان الكاميرا تعرفك حاضر، اقعدى يابنتى فى نفس المكان الله يهديكى عشان الكاميرا حافظة مش فاهمة حاضر، إجراءات روتينية عقيمة قرفتونا بها،وبعد ده كله منصه واقعه و3 امتحانات ضاعت ومفيش حاجة بتفتح ولا ورق بيتحمل ولا إلكترونى موجود”، مؤكدة: “الغلطة غلطة الوزارة هى تتحملها أنا غير ملزمة إنى أتحملها وولادى، وتسألت: ”هو أحنا  كنا أكلنا إيه عشان اشرب عليه ميه؟".
 

أولياء الأمور يطالبون الوزارة بإعلان اجتياز الطلبة الترم الأول

وطالبت تهانى محمد ولى أمر الوزارة، بإعلان اجتياز جميع الطلاب الترم الأول، معقبة: “لأنها غلطتهم ويحاولوه يتفادوه أخطاء الترم الأول ويشدوه حلهم فى الترم الثانى ويتلاشوه أخطاء الترم الأول، ويتم امتحان الترم الأول ورقى يترفع على الموقع زى الصفوف الأولى بس ده لو ربنا كرم الموقع ونفخ فى صورته وفتح أصلا ومنبعتش بريد ونتحمل مصاريف زيادة”.

وأضافت: “أنا غير ملزمة ولا ذنبى أقعد ألف ورا كل ولى أمر أسال دخلت إزاى طب عملت إيه، أنا دفعت كل اللى مطلوب، وعملت كل اللى قالوه، مفيش مدارس هاتى كتب خارجية اشتغلى مع عيالك بدرى عشان الوقت وتلاحقى عليهم عملت كل حاجة، حقى أخد خدمة  محترمة ادخل على موقع مظبوط مش اتحايل وأقعد ألف شرق وغرب”.