الورقي
بالصور.. نكشف سبب استمرار قطع المياه بمدينة الشيخ زايد
يعيش سكان مدينة الشيخ زايد، حالة من الغضب لاستمرار إنقطاع المياه بمدينة الشيخ زايد لليوم الثاني على التوالي وتحول المدينة لطوابير من المواطنين للحصول على كفايتهم من المياه من خلال سيارات المياه المتنقلة.
سبب قطع المياه بمدينة الشيخ زايد
وكشفت مهندسة سبب قطع المياه بمدينة الشيخ زايد، حتى الأن والمجهودات التى قام بها المسئوليين في هيئة المجتمعات العمرانية وجهاز مدينة الشيخ زايد، لتخطي الأزمة.
وقالت في منشور لها على "فيسبوك" لتوضيح ما يحدث "كلنا عايشين أزمة انقطاع المياه بمدينة الشيخ زايد أكتر من أربعة وعشرين ساعة وضع مأساوى، حابة أشرح لجيرانى الوضع كان عامل أزاى المياه موجودة فى النيل بيتعمل جمب النيل حاجة أسمها مأخذ عبارة عن طرومبات رفع بترفع المياه عشان تدخل فى خطوط تسمى خطوط ناقلة للمياه وهما عبارة عن خطين قطر ١٨٠٠ مم ماسورة من نوع يسمى GRP.
وتابعت قائلة: "والخطوط ديه بتوصل لمحطة مياه زايد وطول الخطوط ديه أكتر من ٦٠ كم، وعلى الخطوط ديه بيكون موجود غرف خرسانة تسمى غرف محابس وبيكون فيها محابس بأنواع مختلفة سواء محابس قفل أو غسيل أو هواء، وبعد المياه ما بتدخل محطة زايد فى مراحل كتير معقدة وجدير بالذكر ان إنشاء محطة مياه ممكن يوصل لمليار جنيه.
واستكملت قائلة: "نرجع تانى لموضوع الكسر
أول خط من الخطوط ديه أتكسر فجر الأحد وغرق القرية اللى هو ماشى فيها وبعدين شغلوا الخط اللى جمبه فضغط المياه شديد فجر الخط التانى "أسباب الكسر أنا عرفاها بس مش هقدر أكتبها الا بعد الجهاز ما يعلن عنها"
لأن الاسباب ديه كل اللى بيشتغلوا فى البنية، التحتية مثلى عارفها وبيعانى منها بعد ما اكتشفوا أن فى كسر أبتدوا يحفروا وينزحوا المياه وده مجهود لا يستهان به تم نزح كميات مهولة من المياه واترمت فى شبكات الصرف الصحى وربنا يستر على الشبكات ديه، وده قد يستغرق يوم كامل، وبعدين يقطعوا الماسورة ويركبوا بدل الجزء اللى شالوه بعد ما يشمفروه بالصاروخ وده برده بيأخد وقت هحط صورة وهما بيركبوا حاجة اسمها وصلة جونسون بتتركب بمسامير ربط المسمار الواحد قد يستغرق قرابة العشر دقائق، وبعد الأنتهاء من ده
بيطلعوا الهواء من الخطوط لأن الهواء ده ممكن يخلى الخط يتكسر الله الستار وبيرجعوا يشغلوا المأخذ اللى أتكلمت عليه فى الأول، والمياه تمشى فى الخطوط وبتأخد وقت على ما توصل محطة زايد وبعدين المحطة تشتغل فى معالجة المياه وتتضخ المياه فى المواسير اللى داخلة لينا.
وختمت قائلة" أنا ما بشتغلش معاهم بس ديه طبيعة شغلى بحكم أنى مدير عام فى شركة كل شغلها بنية تحتية ومحطات مياه وروافع صرف
وليا معارف فى الهيئة كانوا واقفين طول اليوم ما روحش بيوتهم برئاسة المهندس عبدالمطلب عمارة وكل مسئولى جهاز زايد".
