"أمهات مصر" ترصد أجواء وشعور أولياء أمور طلاب الثانوية العامة قبل انطلاق الامتحانات

"‏أولياء أمور طلاب الثانوية العامة طمنونا عليكم مختفيين ليه؟، كان الله في عونكم ويقويكم‏"، سؤال  طرحته عبير أحمد، مؤسس إتحاد أمهات مصر للنهوض بالتعليم، وإئتلاف أولياء الأمور، لتنهال عليها عشرات التعليقات.

وأوضحت عبير، أن تعليقات أولياء الأمور جاء أغلبها معبرا عن خوف وقلق واستعداد لامتحانات الثانوية العامة المقرر انطلاقها الإثنين المقبل الموافق 12 يونيو، داعية أولياء الأمور والطلاب بالتوكل على الله والتركيز وتهيئة المناخ الملائم داخل المنزل، متمنية التوفيق لجميع الطلاب.

وجاءت بعض التعليقات على صفحة اتحاد أمهات مصر للنهوض بالتعليم، كالتالي: "واثقين في ربنا إنه عمره ما هيضيع تعب أولادنا ولا تعبنا، رب الخير  لا يأتي إلا بالخير، ربنا يقويهم على اللي جاي إن شاء الله"، بينما ذكرت ولية أمر: "بصراحة قلبي هيقف من الرعب، ربنا يكرمهم 
بصراحة المواد الغير مضافة ملهاش أي لازمة وهم زيادة على الولاد".

وأضافت أخرى: "بنشجعهم وديما أقوله مهما كانت النتيجة أنا فخورة بيك جدا، ومن وقت للتاني بكون أشد شوية نهزر ونسيب المذاكرة شوية كده يعني علشان يستعيد نشاطه وقوته من جديد، وربنا يكرمنا".

واستكملت ولية أمر: "طبعا من التوتر والخوف بنتى بتحس نفسها نسيت فبتراجع مع مدرسين يوتيوب عاملين ملخصات للمنهج وبنحل امتحانات وربنا يوفقهم جميعا، وبحاول اطمنها على قد ما أقدر وأديها ثقة فى نفسها يعنى مبحطهاش تحت ضغط عشان متحملش نفسها فوق طاقتها وتتوتر أكتر دعواتكم ربنا يجبر بخاطرنا جميعا".

ووجهت ولي أمر حديثها للمراقبين، قائلة: "عزيزي مراقب الثانوية العامة، مجرد ما تبدأ المراقبة بلاش تعمل توتر ودوشة جنب الطالب وحاول تكون ليه أب قبل إنك تكون مراقب مش مطلوب منكم غير تظبطوا اللجنة بهدوء، زي ما أنت ليك أبناء وهتخاف عليهم أيام الامتحانات دول طلاب وليهم أولياء أمور وقلوبهم بتتقبض عليهم،
حاولوا تهيئوا اللجنة لحالة من الهدوء التام والطمأنينة بين الطلاب وطمنوهم طول اللجنة كل شوية وربنا يجازيكم خير".