فخ الثراء السريع السبب..
كيف تحمى نفسك من منصات التداول الوهمية؟
كشف هاني أبو الفتوح، الخبير المصرفي، عن الفرق بين المنصة الموثوقة والنصابة، وأشهر طرق النصب وطرق الحماية من منصات التداول الوهمية.
وقال «أبو الفتوح»، إن الفرق بين المنصة الموثوقة والنصابة، أولًا: الترخيص، متابعًا: «قبل ما تفكر تحط فلوسك في أي منصة، اسأل نفسك: هل المنصة دي مرخصة؟، الجهات الرقابية في مصر زي البنك اللمركزي أو الهيئة العامة للرقابة المالية أو الهيئات العالمية زي FCA في بريطانيا وSEC في أمريكا هي اللي بتدي التراخيص، لو المنصة مش مرخصة، اهرب فورًا».
وأضاف: «ثانيًا إخفاء الهوية: لو دخلت موقع المنصة وما لقيتش معلومات عن المقر، أو أصحابها مجهولين، فدي علامة خطر كبيرة!، ثالثًا وعود بأرباح خيالية: لو المنصة بتقولك هنخليك مليونير في شهر أو مكسبك مضمون 100%، اعرف إنك داخل على عملية نصب محترفة، رابعًا: ضغط نفسي للتسجيل بسرعة: المنصات الوهمية بتلعب على استعجالك، يقولك العرض قرب ينتهي، أو المكان محدود عشان متلحقش تفكر وتراجع التفاصيل، خامسًا: مشاكل في سحب الأموال: لو بدأت تستثمر ولقيت صعوبة في السحب، أو طلبوا منك تدفع رسوم إضافية عشان تستلم أرباحك، فدي علامة واضحة على إنك وقعت في الفخ!».
حول طرق النصب قال: «أولًا: مواقع شكلها احترافي: بتلاقي موقعهم معمول بشكل جذاب، وفيديوهات دعائية قوية تخليك تصدق إنهم شركة عالمية، ثانيًا: استخدام المشاهير: كتير من المنصات الوهمية بيستخدموا شخصيات معروفة على إنها داعمة ليهم، وبيعملوا حفلات جايبين فيها شخضيات مؤثرة لكن الحقيقة إن المشاهير نفسهم مش عارفين حاجة عنهم!، ثالثًا: عروض مغرية جدًا: زي إيداع 1000 جنيه واحصل على 2000 جنيه هدية!، لكن الفلوس دي مجرد أرقام على الشاشة، مش حقيقية!، رابعًا: اللعب على عامل الوقت: دايمًا بيخلوك تحس إن الفرصة هتضيع، عشان تخاف وتستثمر بسرعة دون تفكير!»
حول أشهر طرق النصب في منصات التداول، قال: «أولًا: مخطط بونزي (Ponzi Scheme): واحدة من أقدم طرق النصب! المستثمرين القدامى بياخدوا أرباحهم من فلوس المستثمرين الجدد، ولما الناس تبطل تضخ فلوس، المنصة بتنهار ويختفي أصحابها!، ثانيًا: التلاعب بالأرقام: بتلاقي المنصة بتعرض عليك أرباح كبيرة في البداية، بس لما تيجي تسحب فلوسك، تبدأ المشاكل!، ثالثًا: إغلاق مفاجئ: منصات كتير بعد ما تجمع ملايين الدولارات، فجأة تختفي كأنها ما كانتش موجودة أصلًا».
وتابع: «منصات التداول الوهمية بتأثر على الاقتصاد، لأنها تتسبب في خسارة مدخرات الأفراد مما يقلل الاستهلاك ويزيد الديون، والمستثمرين بيفقدوا الثقة في السوق، مما يقلل الاستثمارات الحقيقية، وتأثير سمعة البلاد دوليًا بسبب انتشار عمليات الاحتيال».
وحول طرق الحماية، قال: «ابحث عن التراخيص والمراجعات الحقيقية قبل ما تستثمر، عدم تصديق جملة مكسب مضمون، وتجربة سحب جزء صغير من أرباحك قبل ضخ أموال جديدة»