حلمي عبد الباقي: فلوس الغناء في الملاهي الليلية مشبوهة

كشف الفنان حلمي عبد الباقي، عن تفاصيل فترة صعبة مر بها بعد خسارته لأمواله في البورصة ومروره بضائقة مالية.

وقال حلمي عبد الباقي خلال لقائه في برنامج "بالخط العريض" من تقديم إيمان أبو طالب عبر قناة "الحياة": "كنت بغني في الملاهي الليلية عشان أصرف على نفسي وعلى فني، أنا مش من الناس اللي عملت ثروة، أنا كنت بشتغل عشان أنتج لنفسي وأعمل أغاني متكلفة، وفي الفترة دي مكنش في منتج يتحملني لأني بعيد الغناء مرة واتنين المنتج ينظر للموضوع بالناحية المادية فقط، في عز ما الناس كانت بتصور فيديو أنا كنت بصور سينما وكانت بتتكلف كتير الأغنية".

وأضاف: "في فترة من الفترات اللي كنت بشتغل فيها كانت الملاهي الليلية يرتادها العائلات وكبار رجال الأعمال، وأكتر من حاجة وتسعين في المية من مطربي مصر والوطن العربي غنوا في الملاهي الليلية، ولما حسيت أن الموضوع بدأ ياخد شكل مش حلو تراجعت، أنا بحب نفسي وبحب أحافظ على شكلي وبترعب من ولادي لو حد قال كلمة وحشه، في 2007 كانت آخر حاجة عملتها وأقفت الغناء في الملاهي الليلية".

وأوضح حلمي عبد الباقي: "أنا اعتزلت وسافرت حجيت وخسرت فلوسي في البورصة وكنت في ظروف صعبة وكتير قالولي أرجع للملاهي الليلة بأي مبلغ أطلبه لكن كنت أخدت عهد على نفسي، لأني لما سافرت السعودية قابلت حد هناك وقولت له أني بشتغل في الملاهي الليلية وحاسس أن في شبهة في الفلوس وسألته أعمل إيه، وكان رده اني مرميش فلوسي في البحر لكن أغسلها عن طريق الزكاة، وفي 2008 خسرت معظم فلوسي في البورصة وكنت متضايق ومراتي فكرتني وقالتلي أن فلوسي اتغسلت لوحدها".

واختتم حديثه باكيًا: "ربنا كبير أوي أنا قعدت فترة كبيرة جدا محدش في مصر كلها كان يصدق أن اللي كسبته وعملته وأبقى في يوم من الأيام مزنوق، مكنش حد يعرف بالمشاكل اللي مريت بيها ومراتي وقفت معايا كتير".