الورقي
مواطنة تشتكي: شركة زانوسي تماطل في تصليح الثلاجة بعد دفع 2480 جنيهًا
تلقى موقع «النبأ» الإخباري شكوى، من أميرة محمد حافظ، حول مماطلة شركة «زانوسي»، في تصليح عطل في «الثلاجة» وسوء تعامل خدمة العملاء والفنيين مع المشكلة.
وقالت في شكوتها: «احذروا من شركة zanussi الثلاجة باظت من حوالى 20 يوم واتصلنا بالشركة الأصلية عشان تصلحها والفنى جه وغيّر فيها ترموستات وحساس وتايمر وأخدهم معاه وهو ماشى وإحنا مش فاهمين دول أيه واخد ١٠٠٠ جنيه قولنا تمام المهم نصلح تبع الشركة بدل ما حد غريب يبوظها وقال نجربها بعد ست ساعات، نجربها برضو مشتغلتش»
وأضافت: «الثلاجة لسه بايظه اتصلنا تانى، (المضحك هنا بقى ) اللى بترد من خدمة العملاء بتقول لوالدتى اللى جالك ده فنى غير متميز ولازم ييجى لك فنى متميز، وطالبنا الفنى المتميز المهم قالت لوالدتى هياخد كشف 240 جنيهًا عشان يعرف عيبها أيه غير اللى أدفعت من يومين المهم قولنا تمام دفعنا 240 جنيهًا عشان ييجى الفنى المتميز».
وتابعت: «الفنى قال إنها شحن فريون بـ١٠٠٠ جنيه برضو تقريبا هى تسعيرة عندهم فى الشركة، قولنا هندفع حاضر والله ما قصرنا والثلاجة بايظة لحد دولفتي وفى عز الحر والأكل بيبوظ وعايزين نصلحها وطبعا والدتى كانت منهارة فى المكالمة والبنت الللى بترد بمنتهى الهدوء، عايز تقفل المكالمه بأى شكل عشان المكالمه مسجلة، وبعتوا فني للمرة الـ3 المهم رفضنا ندفع كشف وقال الشحن مينفعش عشان فى تسريب ولازم نصلح التسريب ونشحن فريون تانى ب 2800 ج وياخدوا الثلاجة فى الشركة ومعاهم ربنا».
وواصلت: «رفضنا طبعا.. قولنا نكلمهم نعمل شكوى، قالوا هيردوا علينا بعد 48 ساعة وده محصلش، كلمتهم تانى قالوا كمان 24 ساعة ومحصلش حرقه دم والجو حر والثلاجه أساسية مفيش غنى عنها، وطبعا الرد ده كله كان بييجى بعد ما يسيبوا والدتى على الانتظار أكتر من نص ساعه لحد ما رصيدها يخلص وتتصل كل شوية لحد ما حد يعبرنا ورافضين يخلونا نقدم شكوى».
