أحمد سعد يكشف سبب انفصاله عن علياء بسيوني: الشغل خد من حياتنا الأسرية

كشف النجم أحمد سعد عن تفاصيل انفصاله عن زوجته علياء بسيوني، لافتًا إلى أن كان لها تأثير كبير في حياته.

وقال أحمد سعد خلال لقائه في برنامج Sold Out من تقديم الإعلامي محمود سعد، والذي يعرض على قناة CBC: "علياء هي الزوجة الرابعة لحد دلوقتي، وأنا كده تمام مش عايز أتجوز تاني، علياء كانت من أعظم القوى في حياتي، عملتلي كل التغيير في حياتي".

وأضاف: "أنا عندي وجهة نظر أن الست هي المحرك الرئيسي والأساسي للراجل، أي راجل كان عظيم كانت الست دافع ليه وأي راجل كان فاشل كانت الست اللي خلته كده.. هي عملت إيه، هي ست لا تكل ولا تمل هي شايفة أن دا الصح هتقولك لازم تعمله، الست عندها قدرة مهولة في الزن، عندها هدف هتعمله يعني هتعمله، هتيجي تقولك أنت مخرجتنيش وتفضل تكررها فخلاص هتخرجها".

وتابع أحمد سعد: "الست عندها القدرة دي ولو القدرة دي اتحولت لإيجابيات، أنا في الأول لما كنت بسمع منها كنت بقول أنا عارف أنا بعمل إيه وسيبيني أنا هقرر، تيجي تاني يوم وأقولها خلاص، كان عندها صبر مهول واعتقد الصبر ده موجود عند كل الستات لكن استخدامه ساعات بيبقى نكد، عن تجربتي أنا كانت اختياراتي غريبة جدا، بس كان عندي حاجة مهمة لما بلاقي نفسي في حتة وحشة اختار الشخص اللي استند عليه واسلم له دماغي، أنا شايف هو اللي بيقرر وسايبه، كنت سايبها هي تعمل وتقرر كل حاجة في الشغل وشفت نتيجة كلامها ونجاحنا سوا".

وعن سبب طلاقه عن علياء بسيوني، قال أحمد سعد: "اللي حصل بعد كده ابتدى يبقى الشغل كتير وهي حبت الشغل معايا، ابتدى الشغل ياخد من حياتنا الأسرية، هي شخص مجتهد ومحترم جدا، أنا قعدت أجاهد عشان حياتنا الشخصية ولو أنا أناني كنت كملت حياتي لأن أنا الوحيد المستفيد".