الورقي
عبد العاطي يكشف موقف صادم مع نجم أودينيزي.. ويؤكد: "مشكلتنا مع صلاح إننا شايفينه فلاح" !
دافع مجدي عبد العاطي نجم نادي إنبي السابق، والمدرب العام السابق في تادي الانتاج الحربي، والمدير الفني الحالي لنادي أسوان عن النجم محمد صلاح أسطورة منتخب مصر ونادي ليفربول، في أزمته الأخيرة التي اندلعت مع اتحاد الكرة، بخصوص الضمانات التي طلبها وكيله رامي عباس، قبل لقاء مصر والنيجر، في تصفيات الأمم الأفريقية
وبطريقته الخاصة استعرض عبد العاطي واقعة حقيقية، عاشها بنفسه، ودونها عبر حسابه الشخصي على موقع التواصل الإجتماعي "فيس بوك".. قال فيها : "اللي معايا في الصوره ده كان من هدافين الدوري الايطالي وكان هداف فريق اودينيزي اسمه ( ديناتالي ) ولعب فتره للمنتخب.. فريق اودينيزي ده في الدوري بيبقي دايما من المراكز اللي من الرابع وانت نازل".
وتابع: " انا قضيت معاهم أسبوعين معايشه من كام سنه وسالت مدير الفريق عن معاملة النادي مع ديناتالي وكانت مفاجأة لي شخصيا ساعتها انه له معامله خاصه في الفندق وفِي السفر وفِي كل حاجه .. منها انه بيبات في سويت لوحده ليله المباريات اللي خارج ملعبهم والسفريات ألطويله لو بيلعبوا أوربا ليج، كان بيسافر فيرست كلاس أو بيزنيس وباقي الفريق عادي.. سالت: وده ميعملش مشكله في الفرقه قالي: دي بنود في العقد هو متفق عليها متخصش حد ومتضايقش حد طالما في العقد".
ثم قرر عبد العاطي الربط بين هذا الموقف وما تعرض له محمد صلاح مؤخرًا مضيفًا : "أنا افتكرت الكلام ده النهارده لما شفت مشكلة صلاح مع اتحاد الكره وقد ايه عرفت المشكلة الحقيقيه اننا عايزين طول عمرنا نمشيها بلدي وسيبك من العقود والجو ده احنا قرايب في بعض وأكثر حاجه مضايقاني الجمهور اللي شايف طلبات صلاح مبالغ فيها الاول بص علي الفرق اللي بين صلاح وديناتالي وبعدين شوف الشروط الللي حاطتها صلاح ورد علي نفسك"
واختتم عبد العاطي: " مشكلتنا اننا لسه شايفين صلاح لاعب المقاولون العرب ابن قرية نجريج من الغربية ( فلاح يعني ) ومش عارفين اللي وصله انه بقي من أفضل ٣ لاعبين في أوربا والعالم شايفين الجزء الاول من حياته ومش مركزين للي وصله وعايز يحافظ عليها وعايزينها تمشي بلدي يا عم كبر دماغك احنا كلنا أهل في بعض !!!!"
