رأي أقباط شبرا في أزمة قطعة الشعراوي الإملائية ب2 إعدادي

مازالت تتوالى ردود الفعل على قرار إدارة الساحل التعليمية، بشأن تحويل واضعى قطعة الإملاء عن الشيخ الشعراوى للتحقيق، ومطالبات الأقباط بالتحقيق للى أثار الموضوع،واتهامه بالفتنة.

وقال الدكتور أنور إبراهيم، مدير عام إدارة الساحل التعليمية إنه سيتم فتح تحقيق فى الواقعة على الفور، وتحويلها للشئون القانونية وأشار، إلى أن الأمر لا يترك هكذا، مشددًا على احترام الإدارة للإخوة الأقباط، وتحقيق مبدأ المساواة، مقدمًا الاعتذار للإخوة الأقباط فى المدارس التى تم توزيع الامتحان عليهم.
وأكد أن المخطئ سيتم محاسبته، بعد انتهاء التحقيق، مؤكدًا أنه خلال ساعات قليلة سيتم إصدار كافة نتائج التحقيق فى تلك الواقعة.

وذلك على أثر تداول عدد من أولياء أمور طلاب مدارس الساحل، عبر موقع التواصل الإجتماعى  “فيس بوك”، صورة من امتحان الإملاء لطلاب الصف الثاني الإعدادى، معربين عن استيائهم من تناول الامتحان لشخصية الراحل الشيخ الشعراوى، أحد الرموز الإسلامية فى مدارس بها مسيحيين.
بدوره قال الدكتور خالد منتصر، المفكر والطبيب: “ده امتحان الإملاء فى منطقة الساحل التعليمية لمرحلة النقل إعدادى، ملاحظة،اللى وضع الامتحان مش مدرس دى  الإدارة، منطقة الساحل التعليمية يعنى معاها شبرا اللى فيه نسبة كبيرة أقباط”.
وتابع منتصر في منشور له عبر حسابه على فيس بوك: “التعليم فى الدولة المدنية يتعامل مع الوجدان المشترك المجتمعى  الوطنى ويصنعه ويرسخ المواطنة، يعنى مافيش قطعة إملاء يبقى لها طيف دينى مميِز يعنى لا قطعة إملاء عن الشعراوى، ولا قطعة إملاء عن البابا شنودة فى مدرسة تابعة للدولة وليست مدرسة دينية”.

البيوت مفتوحة على بعض

وترى سماح الحبشى مؤسس جروب أولياء أمور مدارس مصر المشكلة الأكبر  أنهم اختاروا شبرا، البيوت مفتوحة على بعض محدش عارف مين متربى على طبلية مين، كلهم ايد واحدة متعرفش وانت معدى وفى لمة ناس قاعدة مين مسلم ومين مسيحي، كلهم شكل واحد ايد واحدة.

وأضافت أن من أثار هذا الموضوع ناس مخها فاضى ام مينا بتعمل الكحك مع ام محمد وام محمد راحة قداس العيد مع ام مينا حلوة مولد النبوى فى كل بيت  فبلاش شبرا إحنا مصريين وهنفضل فى رباط ليوم الدين.
وتضيف عفاف ميخاىيل قبطية من شبرا المدارس فى إدارة شبرا أغلبها طلاب مسيحيين،ومحدش اعتراض ولا زعلان من قطعة الإملاء الشيخ الشعراوى رمز وطنى مصرى لا علاقة له بالدين 
وتقول هو حضراتكم مش واخدين بالكم أن منهج اللغة العربية كله نصوص قرآنية وأحاديث نبوية بنحفظها مسيحيين،ومسلمين.

 وكم  الكتب اللى فيها رموز من شخصيات مسيحية وعلى رأسهم  الدكتور مجدى يعقوب.
خير يا جماعة لو حابين تتكلموا شوفوا صور قداسة البابا شنودة مع شيخنا الجليل وانتوا تعرفوا أن إحنا مصريين وبس،وبلاش حد يقول شبرا
ويضيف آمال نظير: “شبرا بالذات بلد الرجالة وبيوتها محدش عارف مين فيهم مسلم ومين فيهم مسيحى،إحنا مصريين محمد شبراوى  مصرى  ومينا شبراوى مصرى، واللى يستحق التحقيق اللى  نشر الكلام ده”.
ويضيف أمير فهمى شبراوى قبطى مصر البلد الوحيدة اللى  ما تقدرش تفرق فيها بين المسلم والمسيحى،حاجة كدا من عند ربنا كلنا واحد كلنا مصريين بنحب بلدنا الدكتور الاسطورة مجد  يعقوب مصرى الإمام الشيخ الشعراوى  مصرى
الانجليز ايام الاحتلال فشلوا يعملوا فتنة بيننا
عارفين ليه لاننا واحد كلنا مصريين
واللي بيفكر إنه يعمل فتنة أو تفرقة بيننا كان غيره اشطر وا بردو القطعه الاملائيه فيها ايه مش  فاهم؟!".