أول ظهور لـ حورية فرغلي بعد استئصال الرحم (فيديو)

وجهت الفنانة حورية فرغلي الشكر للنجوم وجمهورها على سؤالهم ودعائهم لها، وذلك في أول ظهور لها بعد خضوعها لعملية استئصال الرحم، على قناة art.

ونشرت قناة art عبر الصفحتها الرسمية على موقع التواصل الاجتماعي "فيسبوك" مقطع فيديو للفنانة حورية فرغلي وقالت فيه: "عايزة أقول مدام صفاء أبو السعود بتفرج عليكي من وأنا صغيرة وطول عمري كان نفسي أكون ضيفة في حلقات حضرتك، شكرا إنك افتكرتيني وبهديلك ورد على قدي صغير وبحبك أوي ونفسي نتقابل على الحقيقة".

كما وجهت حورية فرغلي الشكر للعديد من نجوم الفن على سؤالهم عليها خلال فترة مرضها قائلة: "عاوزة أشكر هوانم الزمن الجميل مدام صفية العمري ومدام ميرفت أمين ومدام ليلى علوي ومدام إلهام شاهين وأستاذ أشرف زكي ومدام مادلين طبر ولطيفة وسميرة سعيد وأحمد زاهر ومحمد رمضان كمان سأل عليا، وناس كتير أوي مش عايزة أنسى حد عشان ميزعلوش".

وأضافت: "أنا أتولدت برا وعشت برا وكنت في مدرسة داخلية طول عمري، بابي كان في الكويت ومامي كانت مسافرة وأخويا كان في أمريكا وطول عمري كنت محتاجة للحنان والحنية اللي محستهمش وأنا طفلة، وعمري ما تخيلت أني هحس بيهم زي ما حسيت آخر أسبوع لما الدكتور قرر يستأصل الرحم بالكامل ودا معناه أني مش هيكون عندي أي أطفال زعلت شوية بس الحمد لله أنا راضية، تخيلت أن أولاد إخواتي هما أولادي وأي طفل بشوفه هيبقى ابني".

واستكملت حورية فرغلي: "الحاجة الغربية أن تليفوني من امبارح مبطلش رن من صحفيين وفنانين وناس مش بيشتغلوا في الفن خالص وكمية الدعاء والضحك والحب أنا مكنتش مصدقة نفسي، حصل من الغريب ومحصلش من القريب ودي حاجة مأثرة فيا أوي، وفي يجي 40 شخص أنا معرفهومش ساكنين في العمارات اللي حواليا جابولي شيكولاتة وكيك وفضلنا نتكلم ونضحك، الحكاية دي أدتني قوة وطاقة أني لازم أقف على رجلي وأرجع تاني، أنا الحمد لله بقيت زي الفل ومش هتسمعوا عن عمليات ولا حوادث وهحاول أنقي قصص بتحبوها وأدوار تكون مميزة، هو في عملين مع أستاذ خالد الحجر وأكرم فريد إن شاء الله هندخلهم قريب".

واختتمت حديثها قائلة: "أنا أسعد إنسانة في الدنيا لأني عمري ما تخيلت أن في ناس متعرفنيش بتحبني، وبقول شكرا لكل حد دعالي وزعل عشاني وجالي وجاب لي ورد، أنا فخورة أني مصرية لأن معتقدتش في بلد تانية عملت كده مع فنانة مرت بظروف صعبة والناس كلها وقفت جنبها".