الورقي
علشان نفضتله.. الحكم على المتهم بقتل ابنة زوجته في أكتوبر اليوم
تصدر محكمة الجيزة اليوم السبت الحكم على المتهم بقتل ابنة زوجته الطفلة مكة بمنطقة مساكن عثمان، بعدما تعدى عليها بالضرب المبرح حتى لفظت أنفاسها الأخيرة.
اعترافات المتهم بقتل الطفلة مكة أمام التحقيقات
كشف المتهم بقتل ابنة زوجته الطفلة مكة بمنطقة مساكن عثمان في 6 أكتوبر تفاصيل جريمة القتل في التحقيقات، بعد ارتطام رأسها بالحائط مما تسبب في وفاتها في الحال.
الحكم على المتهم بقتل ابنة زوجته في أكتوبر اليوم
وقال المتهم في التحقيقات: أنا كنت بنادي على مكة، قلت لها هات يا مكة الدفاية بتاعتك عشان أفرشها لك على الفرشة بتاعتك فقالت لي حاضر، بس ما جابتش حاجة ونفضت لي، فأنا ناديت عليها بشخيط وزعيق من على باب الأوضة ولقيتها ساعتها ماسكة إزازة الفنيك وبتحاول تفتحها.
وأضاف: شخطت فيها ورًحت مزعق لها وقُلت لها خدي هنا تعالي ولما جات لي قلت لها أنتِ مش عارفة إن دا غلط وبيتمسح بيه الأرض، ورُحت ماسكها بأيدي اليمين من كتفها الشمال بحيث إنها تلف جسمها، وأنا بزقها كده راحت وقعت واتخبطت في باب الأوضة في دماغها في النص من فوق، فقامت دايخة ومش مظبوطة.
واستكمل في تحقيقات النيابة: أخذتها دخلت بيها الحمام وغسلت لها وشها فقلت بالمرة أحميها عشان حسيتها مش فايقة، وبعد كدا وأنا بلبسها في الطرقة هدومها، لاقيتها بتقول لي يا بابا أنا نفسي أنام فقلت لها خشي نامي راحت داخلة على فرشتي تنام وأنا سِبتها تنام على فرشتي.
وأوضح المتهم: أن المجني عليها كانت وشها في وشه، وكانت المسافة بينهما أقل من نص متر تقريبا، مضيفًا: هي الزقة بالنسبة لي أنا مش جامدة.
واستكمل: أنا أول لما دخلت أصحي مكة وعرفت إنها ماتت نزلت جريت على أمي، وقلت لها الحقيني يا أمي مكة ماتت فوق وتعالي معايا شوفيها يمكن يكون مغمى عليها ولا حاجة، مضيفا: هي كانت هتصرخ بس أنا قلت لها اسكتي هتفضحينا وهتلمي الناس علينا تعالي معانا شوفيها الأول.
وتابع: أنا أخدت أمي وطلعنا على الشقة فوق ودخلت شافت مكة وقالت لي دي ماتت وكانت هتصرخ فأنا قلت لها اسكتي وإهدي انتي كدة هتلمي الناس علينا والبنت كده هتتبهدل وهتتشرح.
وأضاف: عندما سألتني والدتها أخبرتها بما حدث، وإني وأنا بزقها دماغها اتخبطت في الحيطة.
وأوضح أن الفترة الزمنية الفاصلة بين ارتكاب الواقعة واكتشاف الوفاة للطفلة مكة، حوالي ساعة أو ساعة ونص تقريبا بس معرفش هي ماتت من امتي، ولما دخلت أنا لقيتها نايمة على ضهرها ومش بتتنفس وصدرها مش بيتحرك ولا نبضها لقيتها قاطعة النفس ومفيش نبض ولا نفس داخل ولا خارج، وكان جسمها ساقع شوية.
محاكمة المتهم بقتل الطفلة مكة لتعديه عليها بالضرب حتى لفظت أنفاسها الأخيرة
كانت النيابة العامة قد أحالت المتهم للمحاكمة، بعد تعديه عليها بالضرب حتى لفظت أنفاسها الأخيرة بمنطقة مساكن عثمان بأكتوبر.
وجاء في أمر الإحالة القضية رقم 3599 لسنة 2022، إداري قسم ثالث أكتوبر، والمتضمن بلاغا من مكتب صحة ثاني أكتوبر بوصول المدعوة ساره محسن علي أمين وبصحبتها ابنتها الطفلة المتوفاة إلى رحمة مولاها مكة إسلام محمد حسين مهران، وبها بعض الإصابات والجروح وذلك بغرض استخراج شهاد وفاة لها، بإجراء التحريات السرية حول الواقعة وجمع المعلومات فقد تين له من خلال إجراء التحريات بأن الطفلة المتوفاة إلى رحمة مولاها مقيمة صحبة والدتها بالعقار رقم 559 مساكن عثمان دائرة القسم وكذا زوج والدتها والذي يدعى مهند. ع.
