الورقي
بسمة وهبة: نتنياهو متوتر إني عملت فيديو بالعبري.. ورسالتي كسرت عزيمته (فيديو)
أعربت الإعلامية بسمة وهبة عن استيائها من تحريف الفيديو الخاص بها الذي وجهت فيه رسالة لإسرائيل باللغة العبرية.
وعرضت، خلال حلقة الثلاثاء، ببرنامجها «90 دقيقة» على شاشة قناة «المحور»، رسالتها، وقالت: «دي كانت رسالتي للشعب الإسرائيلي ومعروف مغزاها ايه، سيبكوا من العبري المكسر بتاعي.. واضح إن الفيديو بتاعي عمل تأثير في اسرائيل وكنت بقول للشعب الإسرائيلي إن رئيسكم مش مهتم بيكم».
كما استعرضت الفيديو المُحرف، وتساءلت: «هل أنا الشخصية اللي في الشاشة دي؟! يرضيكم كده؟! عاوزة أستحلفكم بالله، هل دي لغتي؟! مش أنا بتكلم عِبري مكسر ومش عاجبكم، حد شاف فمي؟! هذا ليس فمي، لكنه صوتي المفبرك بتقنيات الذكاء الاصطناعي».
وأكدت: «واضح إن في انقسام جوة الجيش الإسرائيلي خلى نتنياهو متوتر إن مذيعة مصرية عملت فيديو يتيم باللغة العبرية المكسرة بس المذيعة دي كسرت عزيمتك ووترتك وقلقتك.. سبحان الله يوضع سره في أضعف خلقه، حاولت إني أعمل حاجة أفيد بيها فلسطين».
وأوضحت «بسمة»: «في ناس مش عاجبها لغتي في العبري، أنا قلت النهارده ريح الزبون، أنا قررت أتكلم بالعربي عشان محدش يضايق، وهجيب حد يترجم الكلام بالعبري.. أنتوا حساسين أوي من حتة بتاعة طلاقة اللسان في العبري، لو إنجليزي أو فرنساوي نص نص ماشي، إنما العبري لأ، لازم اللي يتكلم عبري يكون بيتقنه، وتكون راحت عاشت في إسرائيل شوية فأتقنت العبري! أو عملت فيلم قعدت ست شهور زي مهمة في تل أبيب تتعلم العبري زي الفنانين الجمال ما علموا».
وأكملت: «لما تكون في وسط مذبحة فيها أخوننا وأسرنا وأهلنا الفلسطينيين وكلمتين عاوزين يتقالوا بالعبري قررت أقولهم وأنا في العربية وتحسب لي هذه المحاولة.. الغريب إني لما فتحت أكونتات الناس اللي بتهاجمني لاقيتها أكونتات فيك معمولة إذًا دي حملات ممنهجة من مين وليه مش فارق معايا، بس الأهم إن الرسالة بتاعتي وصلت لإسرائيل واللي مش عاجبه يعمل زيي واللي غيران مننا يعمل زينا».
وأنهت حديثها: «والله ما ندمت لحظة إني عملت كده، والناس اللي بتتريق في منتهى السخافة ولا تسوى شيء لأنهم سابوا الحدث والموضوع وقعدوا يركزوا في حاجة ملهاش علاقة بالمشكلة والحدث اللي إحنا فيه، وأنا هعمل شغلي وأنجح أكتر وهستمر أكتر بإذن الله تعالى».
أثارت الإعلامية بسمة وهبة، خلال الساعات الأخيرة، حالة واسعة من الجدل، عقب توجيهها رسالة للشعب الإسرائيلي، في برنامجها، باللغة العبرية، وطالبتهم مساءلة رئيسهم وحكومتهم عن سر تجاهلهم مصير الأسرى الموجودين في غزة، في ظل القصف المتواصل لها.
