الورقي
هالة خليل عن مقاطعة المنتجات الداعمة لإسرائيل: حركة شعبية طالعة من القلب
أعربت المخرجة هالة خليل عن تأييدها لفكرة مقاطعة المنتجات التي تدعم إسرائيل، بعد الهجمات المتكررة التي يشنوها على الفلسطينيين، طوال شهر أكتوبر الجاري.
وكتبت، عبر حسابها على موقع التواصل الاجتماعي «فيس بوك»: «حملة المقاطعة وتشجيع الصناعة المصرية عملت عندي حالة من التأثر غريبة شوية.. انتشار الفكرة بالسرعة دي بدت وكإنها بديل لرغبتنا المكبوته في مساعده الفلسطنيين بأي طريقة».
وتابعت: «ولأننا مش أصحاب قرار وشاعرين بالخزي، أول ما لاقينا منفذ للانتقام من الغرب لاستهانته بينا اندفعنا بكل قوتنا علشان نقوله إننا موجودين ونقدر نأثر بعيدًا عن قرارات قياداتنا السيادية».
وأضافت «هالة»: «أجمل ما في المقاطعة أنها حركة شعبية طالعة من القلب.. نفسي تشجيع الصناعة المصرية يستمر ويبقى فيه تيار شعبي رافض لأننا نكون فقط سوق مستهلك للمنتج الغربي.. إحنا بلد كبيرة ومواردها كتيرة وأعدادنا كبيرة.. ودي ممكن تبقى ميزة لو شجعنا ودعمنا الصناعات المحلية الصغيرة قبل الكبيرة».
وأكملت: «يعني المنتج اللي بتنتجه مصر مش لازم أبدًا نشتريه من بره حتى لو كان أقل جودة شوية.. معلش نيجي على نفسنا ونعيش عيشة أهلنا.. والله كانت أحسن عيشة.. راح فين الترزي الشاطر.. راح فين بقال الحي ولبان الحي وخباز الحي.. ماله العيش البلدي السخن.. ده حتى كلمة بلدي خليناها شتيمة.. فالحين بس نتحسر على الزمن الجميل وإحنا كل يوم بمنحي ملمح من ملامحه وننسحق وننبطح قدام أي صورة يقدمهالنا الغرب.. ادعموا حملة (عيش عيشة أهلك)، ورجعوا الزمن الجميل».
