الورقي
تامر حبيب لـ صناع «بدون سابق إنذار»: قلقان من إبداعكم.. وهذا ما طلبه منهم
أعرب السيناريست تامر حبيب عن مدى إعجابه بمسلسل «بدون سابق إنذار»، قائلًا إنه تفاعل مع أبطاله، منذ الحلقة الأولى، لصدق وتلقائية أدائهم.
وكتب، عبر حسابه على موقع التواصل الاجتماعي «فيس بوك»: «دون سابق إنذار ومن أول حلقة، قدرتوا وببساطة وسلاسة تخلوني أصدقكم واتعاطف معكم، وبمجرد ما أديتلكم صباعي، كلتوا دراعي، أو بالأحرى كلتوني كلي، بقيت واحد منكم، شايل همكم أدكم وساعات أكثر منكم».
وتابع: «محتاس حوستكم ومتلخبط لخبطتكم عايز أعرف عشان ارتاح وأنا عارف إني لو عرفت مش هرتاح.. خايف على عمر من رد فعلكم أكثر من خوفي عليه من المرض، بس متطمن إنكم بتحبوه أيًا كان المستخبي، وفي نفس الوقت حالة التخبط وعدم الاتزان والتوتر المرضي اللي أنتو فيه قلقاني عليكم وعلى الولد».
وأكمل: «أما عن عمر حبيبي، الولد ده ممثل عظيم، فاهم ومستوعب ومسيطر على أبعاد شخصيته وأحوالها، ولا عمره خرج من الشخصية لحظة واحدة، ولا فقد تصديقه للدور اللي بيشخصه وبالتالي صدقناه بكل حواسنا وبقينا حاسين كلنا إنه ابننا».
وأضاف «تامر»: «متخافش يا عُمَريكو.. هتخف وهتبقى كويس وتاكل تشيز كيك وترجع المدرسة وتعمل كل اللي نفسك فيه.. وعمر بابا وماما ما هيتخلوا عنك.. والنبي يا صحابي وزمايلي الحلوين أوي اللي قدام وورا الكاميرا ما توجعوا قلبي أوي عشان على أد ما أنا ممنونلكم على أد ما أنا قلقان من إبداعكم وواقعيتكم دول».
مسلسل «بدون سابق إنذار» بطولة: آسر ياسين، وعائشة بن أحمد، وأحمد خالد صالح، ونهال عنبر، وإسلام حافظ، وهو قصة ومعالجة درامية ألمى كفارنة، وسيناريو وحوار عمار صبري وسمر طاهر وكريم الدليل، وإخراج هاني خليفة.
