عمري ما عملت مشهد قتل قبل كدا.. مي القاضي: بكيت لما قريت سيناريو "صيد العقارب"

كشفت الفنانة مي القاضي، عن كواليس شخصية "ولاء" التي قدمتها في مسلسل "صيد العقارب" الذي عُرض في السباق الرمضاني الماضي.

وقالت مي القاضي لـ "النبأ": "شخصية ولاء في البداية كانت بنت طبيعية غلبانة جوزها ضربها واطلقت وهي شبه بنات كتير في مجتمعنا، وطيبة ومش بتاعة مشاكل مع حد، لحد ما قتلت معتز وهذا أكتر شيء خوفني، والجمهور هيتقبل ده إزاي، وأنا هعمله إزاي وعمري ما عملت مشهد قتل قبل كدا".

وأضافت: "الموضوع بالنسبة لي كان مخيف شوية، بس الحمد لله عدا، أول حاجة المشهد وقت تصويره كنت خايفة جدًا، واستاذ أحمد حسن المخرج الموضوع عدا معاه بسيط وسهل جدا، وبعدها مكنتش متوقعة ردود أفعال الناس وقولت هيكرهوني جدا، ولكن مشاهد ولاء بعد كدا وندمها على اللي حصل وقهرتها على معتز لأنه مظلوم، جعلت الجمهور يتعاطف مرة أخرى مع ولاء، والحمد لله عدا حلو أوي أكتر ما كنت متوقعة".

وأشارت مي القاضي إلى أنها بكت عندما قرأت السيناريو وشخصية "ولاء" قبل التصوير، قائلة: "دكتور باهر دويدار بعتلي الحلقات أول ما طلعت، وكلمته وأنا بعيط وخايفة احساسه يروح، وكنت حقيقي حاسة أني ولاء اللي قتلت الراجل اللي بتحبه واللي طلع في الأخر مظلوم وبجد كنت مقهورة وحاسة أني في الموقف ده حقيقي".

مسلسل صيد العقارب

يذكر أن الفنانة مي القاضي خاضت السباق الرمضاني الماضي بمسلسل صيد العقارب، وهو من بطولة: غادة عبد الرازق، رياض الخولي، سيمون، محمد علي رزق، محمد علاء وأحمد ماهر، مجدى بدر، سامية عاطف، ميار الغيطي، عماد صفوت، أحمد ماجد، أحمد جمال سعيد، وهو من تأليف باهر دويدار، وإخراج أحمد حسن، وإنتاج فينومينا.